نداء لمن يبا الجوده يجود للشاعر ( عبدالله باني )

[ابوفضل سالم]

كلمات الشاعر / عبدالله سالمين باني ( ابو صالح )
قصيدة مواساه من شاعر لم يواخذه العناد بنكران الجميل وتجاهل الحقيقه
تناول قضية كارثة السيول التي المت بالاهل بمحافظة حضرموت والمهره وشبوه والحديده تناولها من كل جوانبها فهي قصيدة معبره وعصماء

.

نداء لمن بغاء الجوده يجود
يالله يادي من دعاك اتجاوبه = يابلكرم والجود عاعبدك تجود
الحمد لك عد الشجار الخاضبه = وعداد ماقاري قراء طه وهود
والفي صلاتي عالنبي نقتادبه = صلاه ماهبت نسانيس البرود
جبت القلم والهجس جاء من جانبه = وسهرت طول الليل ماجاني رقود
وجاتني اخبار جم متضاربه = وقيدتني بالسلاسل والقيود
ومسيت ساهر نوم عيني حاربه = لما شرق نور القمر فوق الحيود
الريس القائد وصل والغاربه = تلطم ولاهم الصواعق والرعود
خاطر بنفسه والخطر ماهاب به = خفف من الالام موقف مايعود
ياشاهد التاريخ وأللي كاتبه = اشهد على موقف بطل واحنا شهود
وخادم الحرمين ادى واجبه = من دار زينه من سلالة بن سعود
وقفته في الشدات وقفه صالبه = كم قلل الشوكه على قيم العمود
الشكر له يبلغ ويبلغ نايبه = سلطان لي معنا بذل كل الجهود
وعيال زايد يضربون الصايبه =موقف لهم مكتوب في خمسه بنود
اجسور جويه تبيت ساحبه = منهم ومن حاكم دبي كم جت طرود
والشكر يوصل للعروبه قاطبه = من تونس الخضراء الى صحراء ثمود
وحضرموت اعلا قمم متعاقبه = ارض الكرم والجود من زام الجدود
اليوم في محنه حقيقه ظاربه = طوفان جاها سيل والماطر يجود
والسيل جاب الرافعه والناظبه = من روس وادي عمد لما قبر هود
واضرار خلف متحسبها حاسبه = ومخلفاته كل ساعه في صعود
من دي حصل في ساه هي ويا تاربه = وتريم صب دمعي جرا فوق الخدود
ياكم وكم صاحب بكا عاصاحبه = واشياء كثيره لي تحوش بالكبود
ابيوت هدمها وسكه خاربه = والكهرباء مقطوع ومياه السدود
بيوت صبحت سد عيني غايبه = ولعاد خلف منها مدره وعود
ومن القرى كمين قريه حانبه = السيل حاصرها من اجميع الحدود
وعاد في المهره كوارث غاضبه = حتى الجبال الشامخه منها تنود
وفي الحديده الف اسره هاربه = نبغا الاسر لاديارها سرعه تعود
واليوم من عنده ضمير انطالبه = بالدعم اما بالاغاثه او نقود
هذا نداء كل من سمعه ايجاوبه = ياناس حله من بغاء الجوده يجود

مع تحيات / ابو فضل سالم

.