^^^>>> أحسن الله عــزاكـي <<< ^^^

[ابوهاني1]

>>> احسن الله عزاكي <<<

احسن الله عزاكي يالقوافي الجميله = والبقيه براسك يا أدبنا الموقر
راحت أيام عزك والمعاني الجزيله = روّحت للأسف صافي نداها تبخر
كل من جا يخربط في صباحه وليله = قالو الناس رائع جزل راقي ومبهر
لو يقول التطفل فن ما هو فشيله = او يقول الحباري تغلب الحُر الأشقـر
والأصيل السنافي ما يداني الأصيله = والرفيق المجافي بالمواصيل أخبر
ولو تكن كل كلمه جات منه هزيله = ولو يكن كل قوله هرج فاضي مكسر
نرجسيه تعالي مفخراتٍ(ن) عليله = هامجيه خبالي وامتهانات تقهـر
قاـو الله مبدع قل من هو مثيله = قول راقي مميز كل معانيه تسحر
والمصيبه يلاقي من غدا به دليله = وسط سرداب مظلم بالخرافات يزخر
النفاق الكلامي صار اسهل وسيله= لإكتساب الموده والتلاقي المكرر
كل صفحات نِتّك يا أدبنا مليله = من تزاحم بليا ردع او خط احمر
عمّت ارجاك فوضى عارضه مستطيله = دائره في مهاوي أفـق بالي مصكر
ما بقي في سمانا غير نخبه قليله = من نجومٍ(ن) تلالي في دجا ليل اغبر
نخبةٍ ترتقي للنايفات الطويله = تروي الذايقه فن وجزاله وجوهر
لكن احلامها في ذا الزمن مستحيله = خربوها عليهم قوم ( مارس وأولكر)
القوافي سقيمه من دخيل ودخيله = والعذوبه عقيمه من حلاها المسطر
أنهكوها مخاوين الهبل والهبيله = يحسبو خربطهم فن لابد يظهر
ما درو باللذي هو جِد يهوا الثقيله = يحسب إحساب حرفه قبل لناس تنظر
ما يدج إبكلامه عربده مستميله = للتجامل وغيره ما لها أي معبر
كل انسان يُجزا حسب نوع الحصيله = وأكرم الناس الأتقا في القضى والمقـدر
الله اكبر على اللي هد للشعر حيله = والله اكبر على اللي مبتليه الله اكبر

تحياتي للجميع