من الشاعر خالد بن مهنا الى الشاعر عمر الذيب

[خالد بن مهنا]

ياإلاهي لك السلطان في البحر والبر=مطلع الشمس من تشرق إلما المغيبه
كل هذا الفلك ملكك وباامرك مسير=تنظر النمل لي يدبي وتسمع دبيبه
ياجزيل العطاء يسر لنا ماتعسر=يامجيب الدعاء لدعاك عبدك تجيبه
والف صلوا عدد دقات كل قلب واكثر=عاالنبي المصطفى لي كلنا نقتدي به
والصحابه ولي تبعوه في الوقت لي مر=جاهدوا في سبيل الله دفعوا الضريبه
بعد هذا فتحت الباب ذي هو مصكر=جبت قفله من اعلى شعب كلآ يهيبه
قد طلع فيه بو زيد الهلالي وعنتر=شافوا الجان فـــ اشكال السباع المنيبه
جابت القفل جنيه معي ماتعذر=ماتهم المسافه المبعده والقريبه
بينها وبين جدي عهد باالدم لحمر=عهد مكتوب ماحد مننا بايسيبه
جاتني عانيه من عاد سني ثنعشر=جات في الليل في صوره غريبه عجيبه
جاتني عانيه واعطتني السيف لبتر=سيف ماشفت مثله فيه صنعه رهيبه
سيف ماودك الا فيه دوبك تفكر=واستلمته وانا نفسي هنيه رغيبه
تورث الشعر هذي الدار لمان تدمر=صدق من علم ماقوله ولا فيه ريبه
عاد ياما معي في الراس راسي مكسر=من فعال الزمان العيف وين اشتكي به
ماصفي يوم حالي وان صفي تو تعكر=وين برتاح من هذي الحياه التعيبه
عاتبوني هلي قالوا رقد ليش تسهر=في الليالي عيونك للكواكب رقيبه
قلت ماهو بكيفي غصب مانا مخير=كل ماصابني من قلبي الله يصيبه
مبتلي باالمحبه كل ماالليل غدر=شل فيها يون كل ماتذكر حبيبه
قال خلي دفنته جود واخلاص وانكر=كل جودي ومعروفي وروّح وطيبه
قلت مادام طبعه يافؤادي تغير=قال ماباك وانته وايش عادك تبيبه
قال حبه وكل ماجيت باانساه مااقدر=كيف بنسى وبتقنع وانا مبتلي به
خمس سنوات لي يااهل المحبه تصبر=عافراقه وقلبي يحترق في لهيبه
قيدوني بقيد إحديد صب,,,ماتكسر=والمحب مارحم حالتي حاله صعيبه
ذيب ياذيب شف دم المولع تخرر=صوب في القلب حد بيدلني عاطبيبه
وانت ياالمربعي مرجع لكسرى وقيصر=كنت في وقتكم للجيش قائد كتيبه
وقتكم زين مامثله وماوقتنا اغبر=...كل واحد من العشاق حصل نصيبه
قره النوب مايفزع من الطير لخضر=دوبه الا يحن فوق الغصون الرطيبه
غير ماوقتنا ماحد على حد تخبر=لي سكن وسط قلبي ماقدرت التقي به
يومنا اهمر كلام الناس منهم تحذر=تعرف اهل الفتن واهل النفوس الغريبه
يوم ماشي لهم حرفه بغوا السر يضهر=سر عاده خفي وان بان شوها مصيبه
كيف بلقي وانا في حكم قلبي مسيّر=عاد شي مبصره يااهل العقول اللبيبه
عاد عندي لكم محزاه حلها ميسر=من يدير الفكر بايقول كلمه صليبه
عادنا احزيك من رجال كل من تفكر=مايشوفه برغم ان المسافه قريبه
صوت له يستمع هو ذاك صوته مكرر=ينتهي به ومنه لاانتهى يبتدي به
تمت اقوال بو سالم وهلل وكبر=بعد ماهاجسه نقاء البيوت الصويبه
قال صلوا عدد دقات كل قلب واكثر=عاالنبي المصطفى لي كلنا نقتدي به