قلنا لهم ثور قالوا حلبوه

[سبع الليل]

جينا نذكركم نقول الراي والشور انقسم=لكنكم قلت علي مالك ومال النقسام
نحن رضينا ماعلى الراضي خساره اوندم=كل من رضي يصبر عل ضرب المعانق والسهام
الحكم حكم الله ماذلحين والمقصود تم=ماليوم قدنحن على باب الوكل قمنا قيام
ايش استفدنا من كلامك غير تحريف الكلم=والضرب في لموات يكفي ضربهم باطل حرام
كل من عرف يقراء ويكتب عذر مايحمل قلم=ولي ماعرف يقراء ولا يكتب يبصٌم بالبهام
كم من ولد يسرح ويضوي مثل رعيان الغنم=من يوم تشرق لا غروب الشمس وحلول الظلام
كله من اجل القات بايخدم نسم يعقب نسم=وبعد التعب ريته يمد رجله ويتعنى ينام
ذالا كما الشيطان يصبح ضيق في قلبه وهم=وان قد تكلم ماتفند شي يلخبط في الكلام
شباب في العاشره وفي العشرين بيقذفون دم=ولا بهم غير السهر والقات هيمهم هيام
وايش عادنا باقول لا شفت الحكومه والحكم=سكتوا على الباطل ولك يازام بايتبعه زام
لما متى ياناس بانسكت على ظلم الظلم=سنين باتعبر ونحن في قضايا الانتقام
الثور ينطح والبقر تلقي لنا مثله واطم=واهل المحاكم ضدنا قاموا بتأييد النضام
باطل ومنكر في البلد ولعاد حرمه للذمم=كلين به يده ينتش من جلودي والعظام
حكموا علي بالفقرو جازونا على ترك الاهم=تركت كل زينه وقليت الادب والاحترام
حتى صلاتي خايف انساها وجودي كالعدم=ولعادنا داري بعقلي هوسواء والا غرام
العالم اطور ونحن كل قدم يتبع قدم=انه سوى وانه غوى ماشي خريطه والتزام
ذالا نهنبع في الهواء ونصارع اشواك السنم=وان تمت الا هكذا قولوا على الدنيا السلام
الموت باياتي لنا مره لساده او خدم=ولعاد معنا شي خلاف الا عسى حسن الختام
وربنا يستر علينا لطف من عنده وكرم=ويستر الاحوال في الدنيا وفي يوم الزحام
والختم صلو عالنبي تعداد ماحيد انتشم=وتعدادما طارت طيور الجو واسراب الحمام