محاورة بين بن قطمان وعبدالله بن سالمين بن غريب ال عبدالصمد

[بن قطمان]

الاخوان والاخوات الكرام
السلام عليكم ورحمة الله وبركاته

اقدم لكم هذة الليلة هذة المحاورة الهاتفية
والتي جرت بيني وبين الشاعر
عبدالله بن سالمين بن غريب بن عبدالصمد
عسى ان تنال على اعجابكم

وقد بدا بن غريب

يا أهل المعاني ذي تديرون الفكر=عيني على مركب في الغبه طمر
قولو لبن قطمان شي عندك بصر=ولا شف المركب في الغبة غريق
خايف على لولي وخايف عالدرر=في بحر مظلم مالحقنا فيه بر
قالولي الربان يمشي عالخطر=وش يخرج المركب من البحر العميق

رد بن قطمان

ويقول بن قطمان قد ضاع البصر=مادام كل واحد على قرصه جمر
مليون وألقو فوقهم سبعه عشر=للمؤمن الجنه وللكافر حريق
والله يعين الناس من شغل الغجر=حدادهم ظالم مبهذل بالنجر
والسوق ياويلاه من شغل التجر=وكوادر الشرطه على عرض الطريق

بن غريب

العود ماذلحين مابين النجر=حد منهم ينشر وحد مبعد نشر
واهل العمايم وهم ويااقصار العصر=ذلحين كل واحد يشجع له فريق
وصاحب القمبوس قمبس عالوتر=الطبل و المزمار عند اهل الوصر
كلن على كيفه يجر الصوت جر=والشرح مايعجبك لاماله صفيق

رد بن قطمان

ببني حجر ياصاحبي فوق الحجر=وباتمسك في جليلين العجر
والمال ذي مدمون بايلقي ثمر=والصدق عنواني معك لنته صديق
والادمي ياخذ من الدنيا عبر=يحسب حسابه لاطلع ولا ندر
يصمد ولا يجتر قفا بعض الصور=ويبند الياقوت من صنف العقيق

بن غريب

هرجك كما طعم البغيه من صرر=جبر عظامي بعد ماكانت طير
يدي بيدك بنتقصص للاثر=والعيد بانلقيه بالكبش العريق
والوضع حتى الان عاده مستقر=والحبل مابين العرب مزرور زر
يالله تجبر عظم عاده ماجبر=يوم الشقيق اليوم ينشد عالشقيق

رد بن قطمآن

والهرج من عندك يسر الحال سر=واحد ولكنك كما عشره نفر
تكتب على كل المعاني والفكر=واليوم بانعطيك في الرتبه فريق
ياريتني لاقيك لاطاب السمر=واظفر بسمرتكم مع من قد ظفر
وصافحك من بعد ماجول النظر=هذا جوابي واطلب الرد الحقيق

بن غريب

انته وانا ياصاحبي شفنا بشر=ريت المسافه بيننا مد النظر
ريتك في الدمام ولا فالخبر=انا مقيد وانت فالدوله طليق
ان طالت الاعمار بيطيب السمر=في داخل الوادي وفي بندر عمر
وان جيت لاسيؤن حيا الف كر=عالعز والناموس يا اغلى صديق

رد بن قطمان

اصبر وصابر كم وكم مثلك صبر=ربي جبرنا عالتحمل في السفر
والله يفرجها لنا بعد العسر=والله يداولها من الزام السحيق
خرمان للسمرات شف راسي طير=وارضي لها الذكرى حجرها والشجر
واشعابها واخبوتها بحرا وبر=خرمان ماهي للشواهي في بريق

بن غريب

انا معذب و المعذب في كدر=ريت الكفاله بايشلوها التجر
ياحيدره مسكين من حبله قصر=في ذا الزمن مابايحصل له رفيق
وانته في الدوله وراكب لك شفر=ملقي لها جولات في بحرا وبر
ساعه قدا روما وساعه للمجر=ماتنتظر تكسي على خط الطريق

رد بن قطمان

اليوم قربنا على سن الكبر=ولانسينا ايامنا وقت الصغر
والذري مايطلع في المال العفر=والبعد والحرمان حاجه لاتطيق
ومركب العشاق عاده ماشمر=بوزيدبايشهد مع يحيى عمر
وانته قدك معهم تجر الصوت جر=والوقت يتوسع وساعه فيه ضيق