أحمد سعيد باسد المشجري

[احمدباعجره المشجري]

نا بديبك يالذي عامد سماك المعتلي =يامن خلقت ادم وسويتة بشر من ماء وطين
وخلقت مخلوقات في دنياك شيء ماتحتصي=يامخرج الميت من الحي ياقويا يامتين
واعطيت وتكرمت من خيرات جم ماهي شوي=والحمد لك والشكر ينبع من قلوب المسلمين
والملك والتصريف لك يابالكرم في كل شيء=والارض ارضك والسماء هي والنجوم الزاهرين
لاقدك راضي علينا كل امرا ينقضي=وبقدرتك يارب يارحمن كل قاسي يلين
والفي صلاتي عا النبي دي ما بعث بعدة نبي =جد الحسن طة حبيب الله رب العالمين
والخلفاء بعدة لهم ذكرى ولاباتمتحي=دي يمشو الا عا دروب الصدق والهرج اليقين
بوبكر هو وعمر بن الخطاب ماباينتسي=ذكرة..ولاالعثمان بن عفان ماحنى ناسيين
وصاحب السيف المهند ذلك الفارس علي=لادعاء رسول الله منة جاة في ساعة وحين
والآل والاصحاب والتبعة وكل من يقتدي=بالمصطفى بايدخل الجنة بجيز الداخلين
وبعد ذا قم يارسولي وانتبة لرسالتي= وطلع من مطار الملك في بنج سبعة واربعين
وانزل في الريان دي يمتاز بالجو النقي= ودخل في الصالة وبايستقبلوك اموظفين
وقلهم بالباص حطو ختمكم ذلحين لي =خلوني امشي للمكلا دي لها منظر حسين
لاشرج باسالم قصد ولابغيتك تختفي=ودخل في الدكان حيث اصحابنا متواجدين
وقلهم نا جيت مستعجل ولابغيت انتهي= والمعذرة والعفو لاقد الزيزوات امحملين
وطلع وشل نفسك مع دي بايروح لولي= ووقف معة بالفرش من حيث المواترواقفين
هذا وبعد الفرش قدامك طرق ماتهتوي =لما تعدي جول باحاوة مع سيلة قرين
وباتجي لما الصدارة وامش عاخط مستوي= ساني قدى يبعث ولاتلفت يسارك واليمين
ساعة ونص وانتة قدك شرفت عالحيد الشبي=ودخلت في وادي يحن القلب عا ذكرة حنين
ولاتوقف غير في العدلة ولاباتحتجي=في ديرة الشهم الوفي مولى الشروع الوافيين
قابوس دي خليتك اتسافر لاجلة معتني= باتلحقة من يوم قد جهزلك المستقبلين
بي قابلك باعيال عمة بين كمن دوسري= ناصر وعبدالله وصالح بن حمد والباقيين
وبن عمر في سعفهم بي جي وصدام الذكي= والثالث امحمد حسن واخوتة بين الحاظرين
واسال على فيصل وقلة خلوأمحمد يجي= وحمد وبوعربد وثابت بايجونك عانيين
وقلهم احنا هناء في خير ماحد يشتكي= وبالعافية والشهر في الغربة كما اربع سنين
وقل لقابوس انتبة لاباتوفي كلمتي =شفني بغيتك تستعد وتكون لكلامي فطين
بالصدق واجهني وخل كل من زعل ولا رضي= والوقت هذا بايجيب المشتحن والراضيين
وقدك عرفت القصد والمقصود مانتة شيء غبي=قم خل كل مخفي باسرع وقت من عندك يبين
لاتسيبني محتار مابين البيع والمشتري= والواجب اتحط النقط فوق الحروف الناقصين
وابغاك تظهر مامعك دي في المكان الداخلي=وماتعصى بايجيبوة القروش الناطقين
وانا اذا سددت شفني عالهدف ماباخطي=قدها من اول عادتي صيب الهداف المبعدين
والعفو اذا زليت شفني باك تحمل زلتي=والعالم الله بالذي في القلب دي بين الريئين
ومعي نصيحة لك من الزلات لاباترتوي= صل واذكر الله والحذر لاتساعف الامصليين
واد الفروض الخمس عاأوقاتها لاتغتوي=عنها وتتمشى مع الشيطان وابليس اللعين
ومن يوديها في المسجد علية الله رضي=يامن ويستامن ويلحق خير في دنيا ودين
واحرص على رمضان وصيامة وكل مسلم تقي=لانتة تباء تدخل من الريان باب الصائيمين
وحسن اخلاقك وبعد وتجنب اللفظ الحفي=وكن فتى طيب من عداد الرجال الطيبين
وعادني باوصيك في شيء دي يفيد الادمي=بالصبرولقة تاج عاراسك وربك بايعين
بالصبر ايوب التزم وهو بعلة مبتلي=وقال باتصبر وربي دوب هو مع الصابرين
وبعد طول الصبر عود وانقلب واحد خري= وقبل على زوجتة في منظر يسر الناظرين
وقبل ماتعرفة سارت وسرعت باتختبي= قالو لها ايوب هذا وارجعي لاتختفين
وتحمدو لله حمدا" باقيا" لاينتهي=وعاشو العمر الذي باقي وهم مستبشرين
والختم باكرر صلاتي على الحبيب الهاشمي= شفيعنا في يوم غير المال ينفع والبنين

منقوله لشّاعر احمد سعيد باسد \اتمنا تنال رضاكم