صدق المشاعر

[القنّاص]

يناظر وابتسم ظني شعاع البرق لماعي = الا ياطير نا شوفك تحلق في سماء كوني
عيونك يالمها تقتل حد السيف قطاعي = سهام الموت ترسلها تجاه القلب يرموني
حياتي في خطر منك عروق القلب نزّاعي = انا مكتوب لي شوفك صدف واقدار جابوني
الا ياقلب ذي المره تحاول ليه اقناعي = بانه غير احساسك بعشق الزين مفتوني
غريب اليوم في لحظه لأمر الحب تنصاعي = ترا ياكثرهم قبله وفي العشقه تحدوني
انا من قبل ماانزل احدد درب مطلاعي = دروب العشق كم مره تجاه النوف حدوني
جفول الصيد لاشفته بدونه صعب مرجاعي = نجيب الوعل بقرونه انا القناص سموني
لمست الفرق في ذوقك فاهم كل شي واعي = جمالك صدق جنني بكل مافيك مجنوني
تقول لي ابتعد عني اذا المقصود ايقاعي = عطيت العهد ماخونك ويبقا السر مكنوني
انا مابيع من يشري وطبعي للوفاء راعي = ونا والله مابيعك ولو عالجمر مشوني
صراحه نلت اعجابي نهيت القلب ماطاعي = وقلبي هام في حبك تراه اليوم مرهوني
امرني نبض خفاقي برجلي جيت لك ساعي = وانا سلمت لك امري وكان الله في عوني
وبعد الود مابيني وبينك شيل لقناعي = وترجم كل ماقلته لواقع شوف لعيوني
رسمنا في الهوى لوحه مزج فنه بابداعي = بجلسه راقي لي عزفه خفيف الروح مظنوني
حديث الليل والغنوه وصوته يطرب اسماعي = على غصن الهوى بلبل يغني لحن سيئوني
عرفنا ميزة اللكزس ولا للكل ينباعي = حديث الصنع موديله وكاله ابيض اللوني
شواطئ نادره تبهراشوف السحر انواعي = تلف امواج من حولي لعمق البحر شدوني
وصلت العمق في بحره وجبت اللول بالقاعي = وذقنا من عسل صافي لذيذ الطعم قيدوني
ضياعي قبل ماشوفه معاه العمر ماضاعي = بدونه حي في الدنيا ونا في الاصل مدفوني
وحس القلب من ذكره يفر من بين اضلاعي = الا ياهل الهوى تكفوا مريض القلب شوفوني
علاجي قرب محبوبي وبلسم كل اوجاعي = اطبا القلب ماقدروا طريح الفرش خلوني
وبس بالعين باشوفه ولانا شخص طماعي = فضيله قبل مافارق لدار الخل شلوني
سويعات اللقاء يبقا موسد خده اذراعي = عيونه بالنظر تسرح تلاقي الشوقي باعيوني
حبيب القلب من دونه حياتي مالها داعي = وهو بالمثل مايقدر يعيش العمر من دوني