زامل بدع وجواب بالجوال

[عيبون]

بدع صالح كشميم

ابديت بك يالي خلقت الناس=سالك بغفران الزلل وذنوب
واجعل لنا طاعتك خير لباس=يالله طلبتك يسّر المطلوب
وبعد يالهاجس شرع فالساس=وابني حجر خل البنا مصلوب
وارسل تحيه لا صليب الراس=بعداد مافالجبح حنّ النوب
وعداد مالبارق مساء قبّاس= واصبح يصب سيله في التجروب(1)
ياهاجسي دوّر على باداس=لي مايهم النوف والتحنوب
قولو لبوخالد شديد الباس=عاصاحبك لاتقطع المكتوب
وان شي غلط فالخط والكرّاس= عدّلت لك بالخنجر المظبوب
بنشدك من سالم ومن جساس=مابينهم هل شي وقع ترتوب
او عادها ممبي معا مدراس= ابليس في مابينهم منصوب
والخوف عالنوبه وعالدباس=وعلى البغيه لا صبح معطوب

التجروب=اسم وادي يسقي احجال حريضه

جواب وليد باسهل بو خالد

يالول غالي ياذهب والماس=غالي وقدرك عندنا محسوب
لويوم في نفسي طراء وسواس=انساك او وسوس بشي مقلوب
مابا حياتي ياصليب الراس= بزقل بنفسي من على شنطوب
وامّا الفُرُق كلّن طمع فالكاس=كلّن مقاوم مابغاء مغلوب
والبهذله جات العرب والناس=لي هي تشجعهم كلف وكذوب
والّي بغا نفسه شديد الباس= ناب النمر بيجيه او خنتوب
تمّو على ماكم واول ساس= مادام ماكم قد غلب مايروب
وان راب بالقوه بشر بفلاس=والشر بايظهر معا لحروب
والشخص لي طيب وهو حساس=باينقلب جنّي وهو مغصوب
وختمها خايف يطيح الفاس= عاراس دوله ناهظه وشعوب