حتى سفينة نوح عاده مانعرف ركابها !!!! الى الاسد القرشي

[الواقعي]

ابيات متواضعه رد على الاخ العزيز الاسد القرشي مع اعذاري له بسبب تاخير الرد

(حتى سفينة نوح عاده مانعرف ركابها)

يا مرحبا با اقوال وصلت كامله متكمله =وابيات من شاعر سمت شهرته فوق القابها
بين العرب معروف واحد من كبار المنزله=وان وصفوا الشعار جده معتلي محرابها
يا شجرة العباس فايش كل مبدع ظلله=بغداد حجّتكم وتشهد بعدكم وش صابها
ماعذر لي جوّب وقد جتني قوافي مذهله=والنيّه الزينه تبيّن من كلام اصحابها
عندي منيبه با تنوّد بالحمول المثقله=لا تهمر المدحر ولا تهمر سقم واعقابها
من عادة النهدي اذا قد شاف مائل يعدله=والراي والحكمه الى النهدي تسير اركابها
من تاربه للجوف مرجع فالأمور الموحله=لتعكلست عالقوم لا يعجز ولا يعكابها
قريت مكتوبك وبعض العلم مثلي يجهله=يوم السياسه بحر ما جربت اخوض اعبابها
من شدة امواجه ربابين السفن في بهذله=عيفه مراكبهم ومصنوعه من اردى اخشابها
شي منهن غرقت وقاع البحر وصلت لسفله=والبعض عاد الموج يضرب من جميع اجنابها
كل ما هدا طوفان بركان انفجر يا زلزله=حتى سفينة نوح عاده ما انعرف ركابها
الروس تتدحرج وفالميدان عاد المقصله=جم ناس فالطابور ماجا دور قطع ارقابها
والي بطا يكفل يدور قده عا من يكفله=ولا نفع ماله ولا عزّه كريم انسابها
والعفو يا وزران منّك وانت راعي لوله=ما تلتحق لولى وثانيها تجي ف أعقابها