03-29-2013, 09:43 PM
|
#1 |
|
حال نشيط
 
|
الحلقه الاولى ... بقلم حمومي من النيد
بسم الله الرحمن الرحيم
مقدمه ... سبحان الله البني ادم من يوم يوعى على الدنياء اول شي يئذنون في مسمعه رغم انه مذلول ولا يوعا لاي شي بس مع مرور السنين يعرف انه مسلم من خلال اهله واللي حواليه ... اخوكم بدوي رحل وخلقت في شعب اسمه شحره في ارض الحموم النيد ولا عندنا شي كهربا ولاشي بقالات يعني معزولين عن العالم بعالمنا عايشين يعني بقعى طرنبس يعني غدرا ... ونملك غنم فروق شي بلاقياس والله ونوق وجمال وكل معيشتنا على المطر ونتنقل من شعب الى وادي ندور مراعي للغنم والابل ... في هاذيك الفتره كنت في سن صغير والله ما اذكر كم بس المهم عندما تضوي بالغنم النغب جدتي اول شي تسويه تصلي المغرب وبحكم اني مذلول كنت استقيم جنبها وكنت اشوف مشافرها بس اللي تتحرك وماكنت عارف ليه بس لما كبرت عرفت ان اللي يحرك مشافره مع الصلاه يكون يقراء قرئان كريم ... لما كبرت شويه قلت ياجده ويش تقولين لما تصلين قالت لي انتبه تقول لحد اقول يارب سامحني شفني مانعرف نفك الخط بس بقلبي شفني نصلي ... المصيبه انا كماها ماعرف نفك الخط نتيجه اننا في الباديه والمدارس بعيده علينا وكنت اصلي كماها احرك مشافري بس ... ووالله انه اي يوم يروح عليا فرض احس بضيق شديد وكاني مضيع شي ... الحلقه الاولي ... طيب هاذيك كانت مقدمه وذلحين اسمعوا القصه وسوف اجزئها الى ثلاث حلقات ... القصه بدت لما دخلت المملكة وطبعا" تهريب وهذا كان زمان وصلنا الشرقيه وجلسنا شهر وبعدها رحت الرياض في الرياض ربك وفقنا واشتغلت في محل وكان المحل قريب من مسجد والحمد الله كنت مواضب على صلاتي في مواعيدها ... رغم اني ماكن اعرف اقراء ولا حافض اي شي من السور وفوق هذا لم يفوتني اي فرض من عادنا في البداوه رغم صغر سني في ذيك الفتره رغم صعوبت الضروف ... المهم كان للمسج اللي قريب شغلي رجال مقيم عليه وكان والله من الرجال الطيبين ويعرف ربه صح ... وفي يوم من الايام بعد صلات المغرب زهم عليا وقال لي يا ابني انته لك ثلاث سنين ولايفوتك فرض وبعض الاحيان لما تتئخر يكون وراك ناس مصليين وليه ماترفع صوتك وتقراء علشان يسمعك اللي تئاخر ويصلي معاكم جماعه ... والله نزلت عرقه مني وسكتت وراسي في الارض ... قال تكلم يا ابني قلت له ياشيخ انا ما اعرف شي لا اقراء ولا اكتب وكل اللي اقوله في صلاتي يارب اعف عني وارحمني ... تصدقون ياجماعه اول مره اشوف رجال يدمع ويبكي من قلبه وقال لي بارك الله فيك وخلك على هذا زمسح على راسي وراح في حاله ... في هاذيك الفتره كنت عادنا صغير في السن ومستغرب ليه يبكي والبكاء عندنا عيب رجعت الى العوبه وانا افكر فيه ساعه اقول ان عنده ثار ويبغى حد معه يسطاح ضليت في العزبه ولا رحت شغلي وخليت المنهالي بدالي وحتى العشاء صليتها في العزبه وطول اللي وانا افكر ليه الرجال يبكي ... تعرفون في ذا اليوم قررت ان اتعلم القراءة والكتابة ... ثاني يوم رحت اصلي الفجر في مسجد ثاني ماهو بعيد وبعد الصلاة رحت المحل ومع الساعه عشر الصبح الا والرجال داخل المحل وقال لي وين صليت الفجر قلت له في المسجد الثاني ... قال يا ابني حد من اهلك مع في الرياض قلت له نعم قال الجمعه غداكم عندي انت وربعك قلت له تم ... الى هنا انتهت الحلقه الاولى والى لقاء في الحلقه القادمه ... اخوكم في الله : حمومي من النيد |
|
| مواقع النشر (المفضلة) |
|
|
|
|
العرض الشجري