طيري بلا جنحان

[عبدالله سليم الجابري]

طيري بلا جنحان غني ولعبــي
ابغاك تتباهي على عين الوشاه

حلي ثياب اليأس عنك وركبـي
موجه من الأمال عاشط الحياه

كوني كما المولود وبدمي حبي
هدي حمول الوقت وكفيني عناه

وان شرق الخاطر دخيلك غربي
حيدي عن التذكار ونسيني شقاه

حلي قيود الصمت عنك جربي
يمكن جدار الخوف يتهاوى بناه

انتي تبين وانا بعد مثلك ابـي
والكل في وده يعانق مبتغــاه

بس القدر للحين شكله مايبي
يعني انا وانتي وهالعالم وراه

كبي على الماضي مدادك وكتبي
قصة جديده نصها ينفح شذاه

شفتي جمال العشب لي مكسي دبي
ابغاك مثله دوم وبنسمة هـواه

ادري مع مافيك يصعب مطلبي
لكنني مثلك ولي قصه معـاه

الجرح من جوفي تعدا منكبي
وطعون قلبي سيلها بالغ مداه

والجرح خاويته وهو فيني ربي
بس الغريبه ماخذا مني مناه

رغم السنين الفانيه يبقى صبي
مايوم في عيني تجاوز مستواه

الجرح ماينسى على بال الغبي
اما فطين العقل يتناسى اذاه

لما متى ودك تظلي تختبـي
الوقت مايخلص ولاينفد بلاه

بيني وبينك يالمشاعر قربــي
خلي طريق السير واحد للمشاه

حطي يدينك في يديني ورحبــي
خلي فؤادي منك يستجمع قواه

كبي على الماضي مدادك وكتبي
قصة جديده نصها ينفح شــــذاه



اخوكم/عبدالله الجابري