\\\\\\\\\======عوض يابو عوض ماله =======\\\\\\\\\\\\

[عمر الذيب]

عوض يابو عوض ماله=علينا سلطن اعياله
عطاهم فوق مانعتاد=لش الله ياخلوفة عاد
حسبته شهم ومسالم=طلع يابوعوض ظالم
يدقدق في الستراوتاد=لش الله ياخلوفة عاد
عور عاعين في ظني=وعن خدمتي مسغني
معه سيناريو واعداد=لش الله ياخلوفة عاد
طمع ومكشر انيابه=معد باينفع ودابه
وهو ذاق اللبن والزاد=لش الله ياخلوفة عاد
وقعنا الوقعه الكبرى=وما في الرهق والمصرى
بيد الفارسي نجاد=لش الله ياخلوفة عاد
لش الله قال بو طارق=من منافق الى سارق
ومن جلاد لا جلاد=لش الله ياخلوفة عاد
تلاشت كل احلامي=وكل ماشوف قدامي
فساد وظلم واستبداد=لش الله ياخلوفة عاد
لش الله وين غشمانش=وشيبانش وحكمانش
فيين المد والاسناد=لش الله ياخلوفة عاد
كفانا ماجرى يكفي=وراكم كيركم مطفي
وبقعاء حولكم وقاد=لش الله ياخلوفة عاد
بغينا من شعق يرقع=بكف راحته والاربع
ويترك عقلة الميراد=لش الله ياخلوفة عاد