=== مــمــنــــــــــــــــــــــوع ===

[الشعف]

لجل الموده جيت متعني انا=بجني مع الشعار من طيب الثمار
والعفو لو شي جات قصره مننا=ذلا المشاغل خلّت التفكير حار
والقصد باهنّي وبارك شيخنا=بالاسم ذي خلاّه مثل النسر طار
ذي هو على يدّه تجمّع شملنا=هو فارس الحلبه وربّان القطار
والليل ياشعار شدوا باسنا=يكفي من الفرجه ويكفي انتظار
كلّن يمد بيده يشارك في البنا=طوبه على طوبه تقع ياخير دار
تبقى الموده عامره مابيننا=والجبر والمعروف في ليل ونهار

[ثابت بن ماضي]

ذا فصل ببدع قوافي قل لطالب جدد= ومطلوبنا منكم فكره نباها جديده
وخذ راي شعفان ان وافق وبايجتهد= قله زهم ولد بن حيدور وقبض بأيده
وحضره لاعندنا لجل القوافي ترد= وان كان زعلان بانعطيه كل مايريده

[طارق صالح بن حيدره]

من دون داعي نوى الهاجس قداكم يشد = يهل الشرف والمروه والعزوم الشديده
وان غبت كمن بطل في مطرحي با يسد = طالب وشعفان يعطونا الفكار السديده
لا حد معه لغز ينطق به وانا بعتمد = بانمسك الزام مابين النقيب وعميده

[الشعف]

ماشي كما التوحيد يالشعار لو نتّحد=ما باتفرقنا حدود إرياض والا الحديده
وان شي خلافات ننساها بلحظة نسد=ونحتكم للعقل .. يوم العقل للحكم سيده
هاتوا خبر في الباب ذي عبْره قرب ذي بعد=يطوي المسافات يتخطّى الحدود البعيده
ان حد عرف للحل لايبخل علينا يرد=وان ماعرف للحل .. بايوصله لمّا بريده

[ثابت بن ماضي]

النت قولوا لبوشعفان ذي نعتقد= هي قربت كل مبعد والحدود البعيده
وان كنت غلطان باحاول ويمكن نجد = وان كان ملقيت منك الحل لازم نريده

[طارق صالح بن حيدره]

حي الله الشعف منه كل شي نستمد = فيه الوفا والتواضع والخصال الحميده
طاب السمر كل واحد عا ذلوله يشد = حصن الشرف والمعزه لازمن بانشيده
النت مافيه غيره وانت نقص وزد = الطايره هي ويا التلفاز واشيا عديده
ان كانه الحل يا شعفاان يالله قلد = من شان نفتح لكم بيبان اخرى جديده

[الشعف]

مادام بن حيدور يالباشق بقولك شهد=بشهد انا .. والناس لي تحضر معانا شهيده
الحل متعدد ولونا جيت للحل عد=بانفتح ابواب مختلفه كثيره عديده
من ضمنها ( المحمول ) و ( الحامل ) وللضد ضد=لكن ذي مقصود شوه ( النت ) يهل القصيده
واليوم يالسمّار كل واحد لسيفه يحد=هاتوا هدف ثاني وخلّونا نحاول نصيده

[ثابت بن ماضي]

ذا فصل ياهاجسي في ذا الليل خذ مني وهت = هتلي خبارك كلها وباعطيك يالهاجس خبار
هتلي خبار اهل العراق العاصيه ذي ماسكت= صوت الكلاشنكوف طول الليل واطراف النهار
هل عاد بومصعب معه سكين ثاني في الكبت= او بايسن الاولي هاذاك قطاع الفقار

[مرعي بن سرور]

وانا سلامي عد مالبارق سنا=لهل الميازر والفلالطنات القصار
قد جيتكم بحكم ساسي عالبنا=قد جيت باشارك معكم فالحوار

الرجا منكم لاتموتون موضوع الشيخ تراه

[ثابت بن ماضي]

ذا فصل يالهاجس تبّصربالبصر=وأنشد على لجواد حمران العيون
لالحقتهم بلّغ جليلين العجّر=ان مسي تعبان واصبح في شطون
والدم حسه في عروقي يعتصّر=وهان عظمي ذي حسبته مايهون
واسبابها الكفاروعيال الكفّر=ذي هدموا حصن العروبه والزبون
وزروا على عنقي بحبل الغدر زّر=افينكم مني وهم ايزرزرون