ديوان الشاعر القدير((مجمل))..هديه من سقيفة الشبامي.

[خالد بن مهنا]

رساله الى القطن

برسلك يالعـــاني توكل ياولــــد = من عاصمة ديره حكمها بن سعـــــود
من حلها محظــــوظ فيها قد سعد = الفــجر يالنشمي تحـــــــرك بالبرود
تضوي شروره ذي سكنها بن كند = والصـــبح باتعبر مراكز فالحــــدود
لاتلتهي فالــعبر لابروج قصـــــد =تلحق مبــارك ذي يرحب بالوفــــــود
قله مســـاك الخير ياشبل الاســد = ياذي تصـونون المخـــــــوه والعهود
لاقد دخـــــلت الدار لا مــنه نشد = قله مجـــــمل قد رسل باقـــــة ورود
ويقولك من جد فالـــدنيا وجــــد = مابايضيّع ربكم هـــذا الجهـــــــود
اول ثمر هذا وخذ بعده وعـــــــد = عاد المواسم ذي من اول باتعـــــــود
ولا .. زمان القحط وزمان النكــد = ماليوم خذ خـــيرات من رب الوجــود
الحمد له والشــكر زايد فالعـــدد = مادام خــــــلق الله قدامي ســـــدود
بايفرح الحاذق وذي هو فالمهـد = مادامكم ســـرتوا على نهج الجدود

للشاعر:مجمل

[خالد بن مهنا]

مشاعر

ياباجناحين ياذي معتلي في سماه = بشكي لك الحال قد زادت علي الهموم
واسمع كلام الذي فالعشق ربه بلاه = يمسي مجمل يسامر في سماه النجوم
فقده لمخلوق ربي فالمحاسن عطاه = من حسن يوسف عطاه الله سبعه قسوم
بعده عن العين زود في فوادي غلاه = احيان عيني تصب الدمع مثل العتوم
ياريت تنفع ! وكل واحد يحصل مناه = ودي كما الصقر ساعه في سماهم نحوم
وانزل بدار الذي فالكون ماحد كماه = ساعه تكفي وحيا بالقيامه تقوم
بامتع العين بتلذذ برغد الحياه = بعطيه علمي وبوخذ من قداه العلوم
باعيش باقي حياتي منسجم في هواه = عسى المحبه مع المخلوق هذا تدوم

للشاعر:مجمل

[خالد بن مهنا]

لحظه على الشاطي

ماتنتسي لحظه صفاء وقت الغروب = وانته على الشاطئ وهب ذاك الهبوب
هب الهواء بحري نقي يشفي القلوب = من عاش ذاللحظه سعد طول الزمان
جلسه على الشاطئ تقع وقت المغيب = ومتعة الجلسه اذانته والحبيب
لالوم في هذا ولا هذا معيــــــــب = تتبادلون الراي في هذا المكـــــان
والطير يتراقص يسارك واليمين = والموج متعاطف ويتلاطم بلين
من شان لاتوصلك شي نطشه بطين = ايش الموده بينكم هي والحنان
متع قليبك في هواء صافي نقي = وانته على الشاطي مع الوجه الرضي
لحظات ذهبيه اظن ماتنتســـــي = فرصتك قبل الشيب في راســــك يبان

للشاعر:مجمل

[خالد بن مهنا]

((بيتين لبن عكعوك))..
هكذا كان عنوان القصيده.للشاعر الجميل مجمل .ومن هنا نستطيع قراءة شخصية هذا الشاعر المبدع المتواضعه جدأ..ومن تواضع لله رفعه.

الحمد لك ياذي خلقـــــــة النوب = وخلقت قوته من عضى لشجـــــار
والقى بغيه فالعلــــب مصبـــوب = فالسوق سعره يشــــــبه الدولار
وبعد يالعاني معي مكتـــــــــوب = تعطيه صالح ذي عليه البـــــــار
ذي حل في رخيه لقاء تركــوب = مايفتشل بك لاقصــــــــــدت الدار
خذ لك من الحاصل من المشروب= فيجان شاهي صنعة الســـــموار
وأجلس بجنبه بلغ المطــــــــلوب = ينشدك صالح شي من الاخبــــار
قله عوافي وقتنا مقلـــــــــــوب = الهيج قد جابوه للجـــــــــــزار
بايعرضونه غصب للتقلــــــوب = بين الدلل حطوه والتجــــــــــار
ذا فحل ذريه ياعرب مجــــروب = ماهو جمل رايه ولامضمــــــار
ولامع اهل السوق للمجلـــوب = الله يعينك ياجمــــــــل هــــــــدار
ذي كان يسلخها ركن فعلـــــوب = يتراقلوا منه وهو الا مـــــار
مابا على لحمر يجيه الصـــــوب = ولا عظامه تقرب المنشـــار
والختم من عندي علي ماجـــوب = ختم بذكر الهاشمي المختار

[خالد بن مهنا]

هذه اولا قصيـــــــــــــــــــــــدة الشاعر الكبير الراعي مرسله لمجمل

البدع قال الراعي

مجـمـل والمجـمـل خـصـه الله بالجـمـالـه =وللجودات لا ضاقت على صحابـه يحملهـا جمـال
عمالـه بتشهـد لـه مـثـل ماشـهـدت فعـالـه =قليل القول وان قد قال يقـرن كـل قولـه بالفعـال
كريم اليـد عفيـف النفـس كامـل فـي خصالـه =مثل أعلى لمن تسميه في الدنيـا بمحمـود الخصـال
وللعـوزان والمحـتـاج حـصـه فــي مـوالـه =ومن له يد بيضاءفي عمال الخير مـا يبخـل بمـال
عسـاء وأتـدوم لـه بالعمـر والعقـبـى عيـالـه =وكل ما هو مع الشيبـان عالعـاده يـورث للعيـال
ولـولا يالمجـمـل لآدمــي نـاقـص كمـالـه =وياسيحان منه في السماء موصوف وحـده يالكمـال
فتـح ياهاجسـي لـي بـاب بدخـل مـن خلالـه =وباحصل خوه وعيال عم وان كان بعدو هـم خـوال
بغيـت أنشـدك يلقـي كيـق مـن شحـت موالـه =ويشكي بأس كن ماشى في الكرعه معه شي راسمـال
وشـل هاتفـه والفالـك مـن الهـاتـف رسـالـه =تغض الطـرف منـه أو تلبيبـه وترسلـه رسـال
وتجبـر خاطـره ويكـون لـك مـفـدي بحـالـه =نهار أتكون له عوزان شف ماشى في الدنيـا محـال
وتتخـبـر وتتنـشـد ولا تـقـطـع وصـالــه =وبالمعروف والاحسان بين الناس يبقـى الاتصـال
دعولـه بالشـفـاء ويـعـود سـالـم لا شغـالـه =ولا له حد مثل بيدير ذي هو تحت يده مـن شغـال
صحابـه ذي فـي المقعـد وذي هـم فـي قبـالـه =مع المعروف والى سعف له والكـل يعطيهـم قبـال
وهـو بـارع وشاطـر مامثيلـه فــي مجـالـه =ولو فكرت بتحصله كل مخلوق بـارع فـي مجـال
ومـن يصبـر بطـول الوقـت مطلوبـه ينـالـه =ولا يقطع لمل يسعى ومـن يسعـى لمطلوبـه ينـال
حجـج ماتنقضـي مسـوى لمـن بيـده رجـالـه =الى عجمت وصمت فرجوا همك صماصيم الرجـال
ويصفـى الجـو لختلطـت جـداده فــي دوالــه =ونا مايطيب لي مجلس سوى المجلس مع الناس الدوال
وكل مخطـي عسـاء مـولاه يصلـح لـه عمالـه =ونا طالبك يامولاي تالي العمـر تصلحلـي العمـال
وصلـوا عالنـبـي مــادام مرسـيـه جبـالـه =وعد ماسبلت وأهبـوب هبـت عاشناطيـب الجبـال

والجواب من مجمل قال

معي هاجس يجملني في الشدات لازم بالجاله =حظر ياهاجسي واوزن قوافيك بميزان القفال
وجملني كما العاده ابا بيتين تكتب في رساله =تصل للراس ذي فالمرجله بيته منيف عالرجال
وكرمني وقهواني بقهوه بن قبلي من دلاله = خصاره في غطاء خرفه مذنب ذي من النخل الطوال
نشد مني ونا واجب علي ذلحين بنشد من حواله =نشد ياهاجسي عاذي نشد منك وبادر بالسؤال
وقله شف مجمل ذالسنه في خير في حاله وماله =عسى الصحه من المولى مع الرزق الحلال
ودنيا ماتجي الانسان ماتعطيه ذي يخطر بباله =كذا طبع البشر كل يوم والانسان في حاله وحال
وساعد من طرق بابك في الشده تعناله وجاله = ولاتتركه في ذاليوم للعليا وساعه للشمـــال
وساعد من كبر سنه وقت الفرض كثر بالدعاءله = وشله لاجلس فالشمس لاتاذيه حطه فالظلال
ولاتفسل في المحتاج لاقد جاك تنوي بالفساله=كريم النفس يالراعي وفي ذالباب يضربك مثال
وذري الجود مثل الذري فالاجواد باتلحق كفاءله= مصيبه ذري يالنشمي في البطحاء وفالناس النذال
ولاربك عطى الانسان صحه كل شي عاده يناله =معك يرتاح بالي لاضكرت الارض واضكرت الحلال
ابا عيشه بذيك الارض لوحتى على صافي زلاله=وباقي العمر نا فكر بها والله با شد الرحال
وباختم بذكر المصطفى ذي هو لنا جاب الرساله = صلاه عالمختار عا خير البريه عد ذرات الرمال

[خالد بن مهنا]

بمناسبة الزياره المباركه لولي العهد صاحب السمو الملكي الامير سلطان بن عبد العزيز حفظه الله لمدينة المكلا ( البندر ) يوم الخميس الماضي خطرتلي هذه الابيات ترحيب بمقدم سموه
في بلده الثاني بين اهله واخوانه سكان محافظة حضرموت الابيه

سلطان وجه الخير للبندر وصل = مليون ياحيا عدد طرح الســـــــــبال
يوم الخميس الظهر طير السعد حل = في سعفه اخوانه صماصيم الرجال
نوره سطع فوق المكلا يوم هل =انســـــــتنا شرفت ياوعــــــل الجبال
فرحه كبيره فالسواحـــل والجبل =بقدوم بوخالد عدد حب الرمـــــــال
والشعب مستبشر ويحذوه الامل = ان الزياره ناجحه في كل حــــــــال
شف مجلس التنسيق يظرب به مثل = بين اليمن والمملكه خير المثال

للشاعر:مجمل

[خالد بن مهنا]

قصيده مرسله للشاعر الكبير:يسلم بن عكعوك

ابديت بك يالواحد القهار =ياذي خلقت الكون يامنان
تغفر ذنوبي شف حمولي جار =والعفوا منك ياعظيم الشان
ندخل في الجنه مع الاخيار =نشرب لبن صافي من المعيان
سعفي محمد و الصديق البار =نلحق عمر ذي خوف الشيطان
من نجد بومتعبب بلد لحرار =حكم الشريعه سطره عنوان
شل الرساله واركب الطيار =وارد فرنسا هم وياالطليان
ساعه ونص فالجو وانته فار =تبلغ لديره حلها شجعان
من دار زينه ذي لهم مقدار =ذي صيتهم قد شاع فالعربان
وانشد على يسلم قصد للدار =عكعوك داهل يكرم الضيفان
ينشدك شي عندك من الاخبار =قله عوافي ماخبر قد بان
مسوا مجمل ذالسنه محتار =من ذي حصل ياشاعر الرميان
الجار مايعرف حقوق الجار =شهدوا علي بالكذب والبهتان
قاضيهم فاجر من الفجار =تهمه وعقلي منها وحلان
ذي شقبي ذي قد حلف فالكار =ياعم يسلم سقبي بدان
كنا معه في حلوها والقار =كنا معه في ساحة الميدان
لكن غدربي عايباً مكار =خرب رباع الدار والبنيان
لكن خابت هذه الافكار =مابي قهد من انسها والجان
بحمي دياري بالرصاص الحار =باردهم من دونها عوجان
محتاج شورك ياحكيم الشار =فالزود وجهني وفالنقصان
محتاج رايك ياجمل هدار =لا تفتكر اني بها حنبان
شارك همومي واحفظ الاسرار =خايف من اليسرى على ليمان
والعفو منك فالذي قد دار =ان شي حصل تقصير فالميزان
والختم صلوا عالنبي مازار =زاير بزمزم وارتوى عطشان

للشاعر:مجمل

[خالد بن مهنا]

عاد ابو راضي

يامرحبا ترحيب بالمليار = مني وذي فالمنتدى شعار
حيا ببوراضي عدد ماسار =من نجد لما وادي الاخيار
حيا عدد ماطير علا فار =انستنا يالشاعر المغوار
العاصمه قد اشرقت انوار =بقدومكم باتنبت الازهار
نبغا الخبر ذي هوعليه البار = اخبار بوطالب حكيم الشار
ربي عسى يشفيه من لشرار =عمره عسى من اطول الاعمار
يبقا في الشرقي سراج الدار =وانته لهم مثل القطامي فار
دايم كذا في والدينك بار =يستر عليك الواحد الستار
وان شي خبر ثاني من الاخبار=او شي مخيله شي من الامطار
نبغا خبارالوضع والاسعار =تفصيل تعطينا مع السمار
والختم صلوا عالنبي المختار=اعداد مازاير بقبره زار

للشاعر:مجمل

[خالد بن مهنا]

تم فك اغلاق الموضوع.وعلى اخونا وشاعرنا مجمل اضافة اي نص لم تتم اضافته من قبلنا.

ومتابعة اضافت نصوصه الى ديوانه والله ولي التوفيق

والعفوء على التقصير يابن الاجواد تستاهل الخير

اخوك/خالد بن مهنا

[الشبامي]

شاعرنا الرائع والخلوق الوفي لزملاؤه الشعراء خالد بن مهنا
مجهود تستحق عليه الشكر والتقدير والعرفان
ويستاهل شاعرنا المبدع مجمل (( بوعبدالله ))
وأرجو من أخي خالد الإستمرار في توثيق إبداعات شعراء السقيفه