حكم وامثال من البادية

[فهد الصفاة]

ويقول بو سلطان شو الهايس قبل=مولى القوافي البديعات الجزال
يحل المسائل هايسي لي ما تحل=ياهل السقيفة عندكم من وقت حال
باشعر وفنونه بانضرب مثل=في دار حاتم عندنا اول مثال
المال في اهل البخل ياحسفه بطل=وفي التالية يبقى مصيره للزوال
والنحل مايبخل علينا بالعسل=بغية عسل يردان من ميناه سال
والنخل من هانه وبدل به بدل=فيه البلادة تجتمع هي والبدال
قذها مقالة من سرق يسرق جمل=والحكم سارق في الخفيفة والثقال
ومن شل كبيرة ما حذف مهما حصل=من الخوف يرقل تحسبه برد الشمال
وكل من يشاور في البداية ماقتل=اقتل وخل غيرك يخبر بالقتال
والدار من يبنيه في ظهر الجبل=السيل ما يوصله لي وسط الجبال
وحبل المودة بخت من عنده اتصل=بين الخوه والاهل يا محلا الوصال
البدر وسط الشهر في ليلة اكتمل=نوره على الوديان ضافي بالكمال
عين الحسد ما عز ابوها الا الحول=ولي ما يصلي على النبي له السعال
قل للغشيم اليوم احسن لك عقل=وامسك لسانك لقلها ربطة عقال
تصوم يالصائم وتفطر على بصل=واللحم قدامك مبرح في التفال
البدو هم الزبر والحضر الطفل=في الطين باتخيل باسرح في الخيال
بدوي مع نشرته في الوديان حل=وخضر المراعي تمتلك كل الخصال
الصبح يسقي الزرع من قطرات طل=والنوم يامحسنه في حضن الظلال
ورود هي وازهار زينة للمحل=وعطرها فواح في ريحه محال
جو الطبيعة فيه يا محلا العمل=يهب النسيم الي يدني الطوال
من زقزقة الطير العقل انهبل=الحان ينشدها عظيمة في الجمال
لا هم في الوادي ولاغم او زعل=يعيش الهناء دايم وهو مرتاح بال
على الخالق المعبود وكل واتكل=سبحانه المعطي عليه الاتكال
ماهو من اهل المكر واصحاب الحيل=العز والناموس عنده راس مال
يكره ينم في الناس ويرض الجفل=ويكره يتنصط الى قيلن وقال
والمدعي للحق اذا جاءه ارتحل=يوفي عهوده كلها على كل حال
والظن ما عنده ولاشك احتمل=مايقبل الاقوال لي فيها احتمال
عشرى وفاطر بينهن هيج اعتقل=يهدر لجاءه الشتاء شد الحبال
والتيس والعرسة ورخلةوالحمل=والشاة والضانة والكبش الحلال
ان كنت ماتعرف شي عنهم سئل=البدو لي عندهم اجابة على السوال
اسماء في الوديان مليانه غزل=في صفحة التاريخ في اول مقال
والمعذرة والعفو منكم على الزلل=باقطع لساني ان غلط او يوم زال

[علي فدعق الهاشمي]

فهـد الصفاة

هلا بك وحياك الله بيننا

انست ورحبت يالنشمي

سلمت وغنمت على هالقصيدة الرااااائعة

صح الله لسانك مليون ولايسدوون

اسجل اِعجابي الشديد

دمت بود

[فهد الصفاة]

بسمك الله كل مسلم هلل وكبر =لك دلالات في خلقك وحكمة واماره
ياسلامي عليكم عد لخضر ولحمر=في الشوراع ينظم سير اسمه اشاره
على المكاتيب نصبر كلنا والمقدر=نحمد الله عالمكسب ومثله عالخساره
من تقدم تقدم ومن تاخر تاخر=ذي قوانين تصدر من جناب الوزاره
ومن تهور على الرادار لا ما تشطر=ومن تسرع تندم وفي التاني الشطاره
ومن تحزم تامن لو صدم ما تكسر=ماتزحزح اذا مر على مطب او حجاره
ومن تكلم في الجوال والله تحسر=بايذوق الاسى على مافعل والمراره
كيف يمشي وهو مازال راسه مخدر=كيف يمشي وهو يشفط سموم السجاره
حط مخفي كانه ليل مظلم وغدر=طول يومه يلف في كل شارع وحاره
صوت مزعج يخلي كل رايق موتر=يظن فعله من اشكال الرقي والحضاره
يربح السمكري موتره دايم مغير=وراعي الزينة ما تنقطع له الزياره
اول الشهر راتب بو المصائب مطير=للمصارف وشرطة وشي اجار العماره
و اخر الشهر في زنقة و حاله مكدر=خاطره في سلف بنكي والا عياره
في ديونه مغربق منها ما تحرر= ماعرف من بوخالد جمال وجفاره
هو تخلف والعالم كله تطور=ولي صرفه على الرادار يلقي تجاره
شباب واليوم شيبه في حياته تدهور=هكذا حال كل من فشل في الاداره
ياشباب احذروا من قيس والعبد عنتر=والمراجل تعيبه وشلها بالجداره
هاجسي لاتوضح خل كل شي مستر=على الفضايح بغيتك ما تشل الستاره
هاجسي جيت انا بسقيك من ماء مقطر=ثلج بارد يخفض فيك رقم الحراره
وختمها بانصلي على الذي جاء وبشر= بشر الناس بالجنة ويانعم البشاره

[بن ضبان]

اللهم صلى وسلم وبارك على سيدنا محمد وعلى ال سيدنا محمد

ماشاءالله تبارك الله اخي فهد ماخليت لنا شي نقوله غير صح الله لسانك
الله يعطيك العافية
حكم من درر
ابارك لك هذه الموهبه الشعرية
تقبل تحياتي وتقديري
اخوك / ابوعامر

[فهد الصفاة]

تشرفت بمرورك اخي بن ضبان

والعفو كان من المفروض اشارك بالقصيدة الثانيه كمشاركه مستقله لكن انشغالي حتم على اشارك بها هكذا وياريت تنزلونها بروحها
تشكرات

[فهد الصفاة]

ياهاجسي الجبار شد الحيل=واعقد تحالف مع الحليله
لازم يذوق المعتدي الويل=ورصاص على راسه مخيله
لازم يحافظ على حقوقه الجيل= ويثور على بترو مسيله
ذا حق شرعي ينوفي بالكيل=ماحد بغى منها فضيله
الي في الوادي ولي في الغيل= اخوه مافيهم دخيله
مصبهم واحد مثيل النيل=والدم واحد والقبيلة
اما السرق الي امتطوا الخيل=لعور ماينسى صميله
واتقسمت البير بالبرميل= كلن برميله يشيله
يالله عليهم باليماني سهيل= يغزي لهم بساعة مقيله
بترو مسيلة شلها ياسيل= وارمي بها وسط الغليله
بترو لها مثل قوم الفيل=قصة تواريخها دويله
يغير عليها طير الابابيل=يهدها ويشفي غليله
يرمي عليها حجارة السجيل= وتصبح في حالة رذيله
هي بنت عربي بنها والهيل= او اعجمي ماله فصيله
يومها اسود سواد الليل= قبيحة تظن نفسها جميله
حنا ندوس الصعب والمستحيل=نخلق لكل غاية وسيله
الجابري نظرته بعد الميل= اسد ماهو بو ثعيله
يلمع بيده سيفه الصقيل= والنعم بالسيوف الصقيله

[فهد الصفاة]

ارحل قلنا له و لو هو ما رحل=عاده بايبكي و يندم عالرحيل
رجال على راسه باتهد الجبل=قبلك بو رشاش ماهو بو صميل
يابن الفرنسيه احسنلك رحل=انك تبا الصحة و العمر الطويل
هذه قضيتكم عصيه ما تحل=خيرنا تسرقه انته و العميل
المجامله راحت وروح الخجل=تقليدهم رايح ويبقى الاصيل
والله ما ننساه الي قذ حصل=لي خربوا كل حلم متنور جميل
في قلوبهم الايمان وحب الدين قل=باعوا ظمايرهم لغربي بالقليل
الفهد لجل ربعه من اشاعره ارتجل=ودايم ادور في بيوتي على الجزيل
في الخير والاصلاح عندي الامل=الجود والمعروف باقي والجميل
والعفو ان ثقلت دمي على عجل= مقهور عا مسافر وعاطل والعليل
المغترب يدعم بقوله و الضؤل=والي في الوادي يحرك الرجيل

[فهد الصفاة]

قصيدة جديدة من اشعار فهد الصفاة

تـوتــال يـاتـوتـال هــــب الــنــود=مـــــن روس دنــعـــة الـنـويـفــة
الفـيـد يـذهــب ويـــن والـمــردود=هـاتــي خـبــر عـبــر الصـحـيـفـة
توتـال تـوخـذ نــص فالمحـصـود=و الـثــانــي الــنـــص للـحـلـيـفـة
وتقسمـت عالحمـر هــم والـسـود=و احـنــا لـنــا كـهــر المـصـيـفـة
الـحــق اهـلــه عــادهــم ارقــــود=مــــا طـلـبــوا حــتــى بـوظـيـفـة
دخـلـهــم مــاشـــي او مــحـــدود=و حـيـاتــهــم مــــــرة وعــيــفــة
قــذ سـافـروا لــدار ابــن سـعــود=و اتـحـمـلــوا غــربـــة كـلـيــفــة
والــي بـقـى يتـنـفـس الـمـوجـود=غـازاتــهــا الـــســـم الـمـخـيـفــة
هــذا السـبـب المقـنـع المـشـهـود=خــلا شـريـف فــر مــن شـريـفـة
النـفـط فـــي ارضـهــم مـرصــود=وعـلـى عيونـهـم حـطـوا قطيـفـة
ماحد بـذل شـي جهـد او مجهـود=و لـلـنـخــل بـايــرجــع خـريــفــة
واين المشايخ وايـن ابونـا العـود=ويـــــن الـثـقـيـلـة و الـخـفـيـفــة
ويـن الشهامـة والحنـق والـجـود=ويـــن الـعـقـول لـيـهـي نـظـيـفـة
ولا عــاد حــد نـاقــد ولا مـنـقـود=امــــة بــشــر مـالـهــم خـلـيـفــة
شـبـاب ال جـابـر ماعلـيـهـم زود=زنـــودهـــم مـــاهـــي ظـعـيــفــة
لـكـن كـبــار الـقــوم بالمـعـصـود=دخــال يضـحـك عـلــى العـريـفـة
هوذاك هو ماشي انقلب في عبود=مـاســك بـكـربــة هــــي ولـيـفــة
وفـي التاليـة القصـد والمقـصـود=مــــــا لـلـعـنـيـفـة الا الـعـنـيـفــة

[فهد الصفاة]

جاءنا خبر عاجل عالمحمول=يبشر بالامطار الغزيرة
عالمبعدات الروس فوق الجول=جارت الادواس وحويرة
الغيث في ذاك المحل مفصول=ما باتخيله البصيرة
العصر دلهم ان صدق القول=من طهوب مسودة كبيرة
سيله في المسيال عرض وطول=طوفان وامواجه خطيرة
هميم سيله سيفه المسلول=وبندقه يطفح بالذخيرة
يهناك يالوادي مطر وسيول=يهناك اشراب وخضيرة
ياريت لي نظرة طمع وفضول= لحظات معدودة قصيرة
زيارة خاطفه ماتقطع المشغول=حتى تقع خبه وسيرة
يالربع بعطيكم سبب وحلول=تيسر عليكم كل عسيرة
تصدقوا وزكوا من المحصول=والخير بايجيكم قطيرة
على ارضكم مابايعود الحول=الا وتشرب كل مطيرة

[فهد الصفاة]

قصيدة بعنوان: الوتساب لفهد الصفاة حررت بتاريخ 18 /4 /2013

يقول بو سلطان نبذة خاطفه =لي ما اعجبتهم ماعليهم شي حسوف
سوال بساله العقول العارفه=لي بايحطون النقط فوق الحروف
اه لي حصل خلاء الحليلة واقفه= في مكانها مكتوب ممنوع الوقوف
من الوتساب جم الحليلة شايفه= ولا حد يظن ان الحليلة ماتشوف
اللفاظ شافتها كثيرة مقرّفه= واللفاظ اخرى كالبغية في القروف
وصور عيفه واضحه ومغلفه=وصور زينة تحتفظ بها في الرفوف
ومقاطع الفديو بعضها مشرّفه=والبعض في جوف الحياء ينحت وجروف
لي مايحس باحسبه جثه مخرّفه =عقله في الدرجة كما عقل الخروف
في الوتساب الناس جم ملفلفه= متنكرين مثل الرسائل في الزروف
وناس مسكينه دوب محذفه= والا سكت وانته معلق بالسقوف
ماتعرف المظيوف من الظايفه= هده كلاميه بها رمح وكفوف
اشكالهم زرع عروقه مجففه=كانهم موسم في وقت اللفوف
بعض العرب فالوتساب مسفّله=وبعض العرب بناموسهم مثل الظيوف
وبعض العرب من اللكاعه خايفه=يبطي معلق لي به رهبه وخوف
والجواسيس دايم فالتنصط مسرفه=ظهورهم جاتي على حسب الظروف
والكذب وايد والحلوف محلّفه=يقصف بلسانه كما رصاص القصوف
اهل السياسة بغوا عسل من مجهفه= سرقوا الخزينة كلها اميات واللوف
واهل الديانة كل حد له طايفه= سني وشيعي دامها تشم الانوف
واهل الشعر وسط البحور الجارفه=ابياتهم تسحر تحسبها صروف
واهل الطرب عندهم معازف ودفدفه=الطبل والمزمار ينقح والدفوف
ذا فصل والثاني طلبنا المنصّفه=مقالب في الوادي تمق سيل العطوف
سيول من دنعه عظيمة مرّدفه=امواجها كانها عسوكر في الصفوف
تنتهي وذبور عادها مخلّفه=من بحر تقطعها المقالب كالسيوف
ذا فصل والثالث عهود مكشفّه=عادات زينة خلّفوها السنوف
وين القناصة لي بوابها مقفله= ياريت بانرجع لايام الزفوف
وين الوعول الي كانت مجفّله= ماليوم مرتاحة في ظل الكهوف
عقول كردا كلها متخلفه= من المنبسط هربوا وقاموا فوق نوف
وين الذكي مولى العلم والمعرفه=لي بايحل اللغز بافكاره يطوف
بسالك من ناقة دوب مكتّفه=وتشرب وتوكل وراسها بين الكتوف
جفونها البيض الغلاظ مخشّفه= وحلّق من فضّة تلمع في الخشوف
وسنامها منتف وجنوبها منتّفه= وظلوعها تعتد من جوع الحفوف
من حلها يهنى له غسل الهمه= ويستاهل العرس من البنت الهنوف