لعذب القوافي عامه وباعمران خاصه

[المهااااااااااجر]

يالله ياربّاه سالك يامجلي كل هم =
ياذي قسمت الريق في الحنجور سابر والنسم =
عساك تغفر لي ذنوبي ما لحق ولاّ قدم =
مانا بري مقدم زماني يوم عاد العظم صم =
من يوم عاد الغشم والمعقول عندي في العدم =
واليوم ضميته وحازم به وهو بي قد حزم =
ذا فصل والهاجس ضوا الليله بقوله قد زحم =
جاني عتيم الليل وقت الست والليل انقسم =
وقلت ياهاجس نسّمني وقم خذ لك نسم =
شفني كما الهيج المقيّد لا القدم فوق القدم =
مانا من الدنيا ولا حتمه على ولا رسم =
من خط جاء مكتوب هرجه مثل حبّات القلم =
جاء من حزوم القبوله ذي زمها بالعصب زم =
وبعد يالعاني توكّل سعف من هو قد عزم =
باودّعك خط الرساله ذي مورّخ بالقلم =
وادخل به الغبّه وبايبدا من المولى نجم =
في بحر ذي موجه على جمع المراسي قد لطم =
وانزل على سوق المكلاّ ذي مدوّر بالحكم =
مسلم وكافر يحكمونه حكمهم مافيه ذم =
وانشد على واحد ولا حصّلته المقصود تم =
صالح ولد يسلم (1)عسى عظمه من كسوره سلم =
سلام له منّي ومن ناصر(2) مزيّد جم جم =
ولا جيت وادي عمد مقصعه المقاصع والخطم =
واعبر على الريده وصيطان القثم =
هذا وبعد ازلم على مندوب ذي مصموم صم =
خذ به قدا القبله وباتجزع على وادي حمم =
وانفذ قد ا سلمون ذي من تحت منفوح الدكم =
واطلعه شوحط بلاد الجربه وأهل الكرم =
وانفذ قدا رخيه سقاها من طروح المدلهم =
وانزل تعظ وأمن لعد تختاف لا ديعت ثم =
وانشد على باقرن ذي برمته زايد عالبرم =
تركة عمر ذي يطرحون الكي من فوق العلم =
وأهل الشروج المفرعه ذي هم يوفون الكلم =
من ضعن لا سحنين لا السنبك ولا مجرى السحم =
ذي حدهم محمي بهم لاخالفت من كل يم=
وقل لهم تكفون واحنا قد حضرنا ماقدم =
صاحب معي قد قال في مقدم زمانه ذي قدم =
بيني وبينه ساسها ماكن على حيد النشم =
واليوم باتخبره من ساس البناء يوم انهدم =
وايش ذا الزمن مقلوب وأهله عاملوا طبه بسم =
إن كان من عندي سلم منه وأنا مانا سلم=
وان كان من عنده يقع في الوقت ياكمن وكم=
من بعد ماسرنا معد واحد على الثاني زجم =
وزيد حاكم ذي تبونه عندكم حط الخيم =
وفرح به الظالم وذي مظلوم كنن وانظلم =
واحنا سرحنا للسواحل (3) حيث لقراص الطمم =
من بعد ما تعبنا وغلقنا الرهائن والذمم=
ماشي علينا نشد لا من خو ولا ولد عم =
والرزق بالمكتوب يتقسم بين الناس قسم =
حد قسمه الوافي وحد لقمته تحصل له بدم =
وان حد كسب في الوادي تقع بفوات جم =
والصوط ما هو كسب يكثر المراعي للغنم =
هذا وتم القول والمقصود تم =
والختم صلوا على الهادي شفيع الأمم=

[/3mr]

(1) صالح ولد يسلم : يقصد صالح بن سميدع قائد شرطة السلطنة القعيطية الحضرمية سابقا
(2) ناصر : مهاجر بأرض الصومال من آل سميدع
(3) السواحل : الاسم الشائع في الأوساط للصومال

[صالح باعمران ابو زايد]

قصيدة ما تحتاج كلام صح لسان القائل
بارك الله فيك اخي محمد على النقل
لك مني كل الوفاء والتقدير

[مبروك بن ماضي]

أخي الفاضل / المهااااااااااجر
هذا هو الشعر الحقيقي
والتراث الأصيل
قول حمران العيون
صح لسان الشاعر
وسلم ذوق الناقل
مع تحياتي واحترامي ،

[المهااااااااااجر]

تسلمو اخواني باعمران وبن ماضي على المرور
ولكم كل الشكر

[صوت سيبان]

أخي المهاجر قصيده من الطراز القديم الأصلي

مثل الصناعه الجرمنيه القديمه(الألمانيه)
نادراً ماتلاقي مثلها مشكور على المجهود
هناك ملاحظه بسيطه بعض الأبيات
تنقصها كلمات مما تأثر على وزنها

مشكور مره ثانيه وتقبل مروري

[مسرور]

لماذا لم تذكر المصدر ؟

هذه القصيدة للشاعر أحمد بن سالم بن عبد بن سميدع ( يرحمه الله )

ستجدها في الرابط التالي الذي نقلت منه دون الإشارة إليه أو إلى اسم الشاعر .


يامجلي كل هم .... للشاعر أحمد سالم بن عبد بن سميدع النعماني - سقيفة الشبامي

لله في خلقه شؤون .


سلام .

[المهااااااااااجر]

شكرا اخي على التوضيح

[خالد بن مهنا]

كلمات جميله جدأ..وقويه...شعر حضرمي..حقيقي ..ويستاهل باعمران..يستاهل هذا الاهداء الجميل...