كنوز من عذب القوافي

[الواقعي]

اخواني لاشك ان هذا الصرح الناجح بكل المقاييس لم تخلقه الصدفه فالنجاح له بيئه خاصه تتوفر بفعل أناس يبذلوا جهوداً جباره في السر والعلن .

وما يقوم به استاذنا وربان سفينة هذا الصرح الأستاذ عقيل بالربيعه الا نموذج لهاؤلا القاده الذين يوفرون بيئه لا ستقطاب الناجحين وخلق مناخ مناسب لنشر اعمالهم ووصولها الى اكبر عدد من الناس .

اخواني مارأيكم لو نتذكر شي من الاعمال والقصائد الخالده الذي لا تمحوها السنين مهما طالت وقد تعرفنا عليها من خلال هذا الصرح وأعادة طرحها لنتواصل مع ارشيفنا ونتعامل معه ككنز .

(اخواني لنفتح هذا المتحف الصغير ونقوم بابراز تحف عذب القوافي من خلاله)


بسم الله ابتدي بقصيده لن انساها (للشاعر الفذ) وفي انتظار ما تجود به ذاكرة كل واحد منكم .

صالح بن عبدالله بن بشر النهدي

(صالح الصيني)

طلبت الذي تشكي له الناس حالها=ومن يعطي اصحاب المسايل سؤالها
وهو رافع السبع الشدايد ومثلها=مهدها ووطاها ورسى جبالها
وبأمره تهب الريح من حيث مايشاء=تسوق الجهام اللي محمل ثقالها
اذا تلاحمت يظهر سنى البرق منها=وتسمع لرعّاده دوي من خلالها
وصبت مزون الخير باكر من الحياء=وسبل على جوّان قفرى سبالها
ويحيي به الله ارض من بعد موتها=تصبح بها البدوان ترعى حلالها
وتمسي عشايرهم سمينه وحفيهم=يعود منافع رعيها في عيالها
فضايل ونعمه ماحصى الناس عدها=وخيرات ماتاتي لمن لاسعى لها
وصلي وسلم عد من طاف بالحرم=وماحطت الحجاج عنده رحالها
على خير خلق الله في العرب والعجم=اذا كل من يشفع عجز قال انا لها
صلاة وتسليماً على الهادي الذي=معه قامت الأمه بصفوة رجالها
ومن بعد ذا ياورع ناولني القلم=مع المحبره والدفتر اللي بجالها
وحوجلي الدله من الهيل والجفل=واخلط بهرها واسقها من زلالها
وفي جوف هنديه من الصفر حطها=على جمر هادي مايغبر دلالها
وقم صب للخرمان فنجالها الذي=يطفي لظى في القلب زاد اشتعالها
وقرب وخذ مني نصايح وقم بها=تصونك من الدنيا وكثر اغتيالها
ترى ماقضاه الله ربك على امته=وقدره في الوقت المقدر يطالها
ومن كان له في الزاد لقمه مقدره=من الله تجي وان كان ماجات جالها
فلا تتبع اللذات في ساعة الصفاء=ولاتغرك الدنيا بلحظة جمالها
تراها لها فتنة عظيمه وتنتهي=متى ماتعكى الآدمي في حبالها
ولاتدوم عزتها ولايدوم ذلها = ولا غبنها دايم ولا ستر حالها
ولاقوة الا يضعف الوقت حيلها=ولانعمه الا يوم ياتي زوالها
ولا لذة الدنيا سوى الا عراكها=ولا للطرايد لذه الا قتالها
ولامن تمنى شي جيه بلا عنا=ولا كل من شاف الثريا ينالها
ولاتخلدوا لنذال من كثر مالهم=ولاتنتسي لبطال وان قال مالها
ونفسك اذا هي للرديه تسير بك=قمعها وقل يانفس مالي ومالها
وعاشر بحسن الخلق صاحبك والعدو=تنال الصفات اللي صعيب منالها
ولاتقفل البيبان عالخصم تحنبه=متى ماحنب كل المصايب لجا لها
ولاترتجي المعروف من غير لابته=ترى الطيّبه عند اهلها واهلها لها
ولاتقول ذا مالي وجاهي يعزني=وتجعل لنفسك مرتقى من خيالها
ترى الكبر يحبط كل طيب من العمل=ويسلب من النفس الكريمه خصالها
ومن قال جمعت التجاره بحكمتي=ندم مثل ماقارون للناس قالها
فقد كان عبره للذي كان يعتبر=وقوماً معه ماهدها لا ضلالها
ومن خاب فعله خاب ظنه في العرب=ويحسب جميع الناس خابت فعالها
فخذ من شبابك مايعينك على الكبر=وللضعف من قوتك قبل انحلالها
فما قوه الا ياتي الضعف بعدها=ونقصان لشياء يبتدي من كمالها
وكن مثل حالي مايعيرني الزمن=ولاسير في وديان معرف جبالها
ولا قدر الا من يقدر مكانتي=ورقبتي محنيها لمن لاحنا لها
ولاتألمت نفسي لمن لايودها=ولاقد بكت عيني لمن لابكا لها
وكلمت نعم لو قلتها ماتبعتها=بلا لو ذهب حالي ومالي فدا لها
اذا تفاخروا لقوام بالعرق والنسب = سلالتي من قوم عظيمه فعالها
وانا من بني قحطان لطامة العدو=قبايل تورث مجدها في عيالها
وصلي على احمد ماتغنت مطوقه=على غصن ميالٍ تغني لحالها