علامة القائل كلمته وليس العكس

[سالم علي الجرو]

لو لم يقولوا هذه القصيدة لشيخ قبيلة لقالوها كثر ممن يعرفون معادن الرّجال . إنّها لأحد مشائخ قبائل حضرموت:

الإستهلال

يالله ياعالم تصاريف القدر=يارافع السبع السما ألعليه
والقاكواكبها وشمسه والقمر=فوق السماوات ارتفع كرسيه
يعلم سرايرخافيه عندالبشر=يعلم نوايانا وهي سرّيّه

إيمان ودعاء

آمنت بحكام القضاخيره وشر=كل ماتقدربايجي مقضيه
بدعيه وترجاه في يوم العسر=هون على عبدك من الشديه
واغفرذنوبه لاتيمم واحتضر=والنفس تضوي راضيه مرضيه
في يوم ماشي مال ينفع لاحضر=ماباتفيداقروشك الفليه

وصف لنهاية الإنسان:

جابو كفن والقوك من فوق السفر=ماشي سوالكفان ذي مطويه
حطوك في شبرين ماكن بالمدر=بايدخلونك يافتا غصبيه
كيف الخبر والضيق في قبرك وحر=ولعادشي بندق ولاجنبيه
وين الذي تهري بهم لاشي خبر=لاصحت فيهم باتصل عالنيه
وقي الطلب ماحدخلف والااعتذر=في طين ساعه تقطع الحنيه
خلوك وحدك لاقدالحال استقر=تمسي بلاصاحب ولاماليه
حتى الولدينساك لاعدا ومر=يوم المقابرواهلهامنسيه
مالك سواغفران ربي لاغفر=والمغفره منه لنامرجيه

الدّخول في صلب الموضوع:

ذا فصل والثاني تهجس بوعمر=سجل قوافي بالقلم فنيه
يالمعتني بوصيك في لمح البصر=شل الرساله ياولد مغريه
واطلع بطياره اف سته عشر=قدها قواعدفالبلدجويه
ماباك تركب ميج تعبر في خطر=ماحد يباها ماركه روسيه
لاعندذي يمدح بحزب المؤتمر=والحزب لصلاحي مع الشرعيه
ويذم حزبي لشتراكي والمقر=مكتب سياسي والخطط شرقيه
في وقتهم من حيث يرتدالخبر=تمسي وتصبح بالحرس محميه
في كل موقع من سواحلها وبر=شرقي وغربي كلها حزبيه
كل من نوا حجه خبيثه ماقدر=مابايعدي والطرق محجيه
يرعا زمان الحزب ذي عدا ومر=قدنا سوا فالكتله الغربيه
فالبيت لبيض ذي يديرون الفكر=والمجلس الدولي مع الشرعيه
قدبوش قايدنا وبالعدل أشتهر=والعز والمقداروالحنيه
واحنا عياله بالنفذ ماأمر=راعي على اولاده وله وديه
وام العيال أم الكبايروالقذر=قدنا عيال الدوله العبريه
أخوه لنافي لرض زمره من كفر=أخوانا في لسره الدوليه
قالو لبا صدام قد سبب خطر=والشعب لازم يطعم الحريه
واليوم شفنا شعب صدام أزدهر=كل ماوقع بحكام دستوريه
كمن ولد في سجن بغدادانقهر=قالو شراذم شر وارهابيه
وايش عادني باقول يابن المؤتمر=ياذي تذم الحزب والشوعيه
عم الرخا والخير في بحره وبر=وارض اليمن تنعم مع الشرعيه
كل من مشا في خط يمشي في حذر=لايوخذونه ناس فالبريه
لابد يشل بندق ويلقيله كمر=قدها حراسه فالطرق أمنيه
وان مامعك تصريح مالك شي مفر=مالك من الحراس شي فكيه
لازم توقف عندغبران الصور=لما تفك لكمارذي محشيه
وان حد تعرض لك وخذ مالك وفر=ماعندهم في لمرشي هميه
وين الحكومه وين حزب المؤتمر=لما متى واحكامهم مخبيه
والقبوله ذي قلت معكم والقور=قدها ركيكه من زمن مقذيه
قدعجوزت من سمح مامعها بصر=كبرت وقدها عالركب مجفيه
ذلا جماله قل لمرصوص العجر=ماهي بشي بلخي ولاجاويه
والعفو لاشي زاد والاشي قصر=من لشتراكي صاحب الشوعيه
والختم باصلي ميه والفين كر=مالاح بارق في علا منشيه
عالمصطفى المختارماهش المطر= وامست نواحي بالمطرمرويه