مساجلات الزامــــل الشعبي

[جمال العطاس]

أولاً : التحية لكل الرجال !! وأرحب بالأخ الكريم نايف باتيس وأهلاً وسهلا به بيننا !!
وخذوا ذا القول :

الشعق مابين أهل سيهات إتسع = وسط الشوارع بينهم صار القتال
من قبل من ديد أُمهم كلن رضع = والأم لا جارت يعقّون العيال
جيوبهم كانت مليّة والكسع = لبسوا مشالحهم وكشخوا بالعقال
واليوم ولد ابليس فيهم قد طمع = ذا يومهم من سمح قالوا له تعال

[نايف باتيس النعماني]

يالهاشمي بين هذولا فرع=طالب وطارق بيهم قيلا وقال
الجود والمعروف حبله منقطع=ابيلس والشيطان قد حصل مجال
ماهو سوى هذا ولاهذا يقع=مابين لخوه ياصماصيم الرجال
نحنا لباكم سهم في عين الطمع=جنبا كما السادات والرئس جمال

شكرا للاخ جمال على الترحيب
وان شالله ان اكون من حلان السقيفه واعلمك يااخ جمال باني كنت عضو من سنه تقريبا باسم المجهول ولكن تعثر دخولي وسجلت باسمي الحقيقي

[طالب النعماني]

اقتباس : المشاركة الأصلية كتبت بواسطة طالب باتيس النعماني

لاحول ثم لاحول يالهاجس بدع=واطرح كلامك في ميازين القفال طارق شعق بيده ومن جنبه رقع=كنت احسبه طيب وهو عله وفال لكن باوصيك ياطارق سمع=شفنا لبا القسمه على رؤس الرجال خلك معي من حيث مابطلع طلع=لما لحط الوعل مثنات التفال

نرجوا الجابه يابن حيدور
هههههههههههههههههههه

[جمال العطاس]

ياطالب الوالد إذا جار وقمع =أو قيّد أولاده بهاذيك الحبال
وش تنتظر غير اللجاجه والفظع = والجور ماله مقدره وإلاّ إحتمال
ذا يومهم بطروا وغرقوا في الشبع = هذه عواقب كل من ساء الفعال
القل والشِدّه دهمهم والهلع = كل من يخالف شرع ربه ذو الجلال

[جمال العطاس]

وقت الظهيرة ساعة المبرِد هجع = تخالط الدخان مره والنفال
حنت رعود الشر والبارق لمع = ذا فعل ولد ابليس متشيطن وفال
يلقم دجاج الربع هاذاك الشكع = كلما بغوا بايقبضونه قام مال
وإن كانوا قدروا يقبضونه أو وقع = يظهر شكع ثاني وثالث يارجال

[طالب النعماني]

يالهاشمي مكتوب كا ماقد وقع=شف لي وقع والله ماله شي مثال
ابليس للرحمن والله ماركع=لما غراء ادم وزول به زوال

[جمال العطاس]

لاتم ذاك الشهر ياطالب وشع = أوحل في برج المتمّه والكمال
الفجر لاقد بان نوره أو سطع = باتختفي كل الكواكب والهلال
عدّا زمان الفخفخه هو والدلع = أيام ماكانوا يدحّوها جبال
عجوزهم مااليوم قد جاها الصقع = قشرا ومعكونه ولاتقدر بحال

[جمال العطاس]

ورّط عجوز أبليس هاذاك ( القدع ) = كلما تكلّم قال هاتوا لي ريال
ووقت الله الله مارقعهم مانفع =مغبون من يقبض بكمبار الحبال
هم حالفوا لحمر وسالم بافنع = وخانهم لحمر وعالبيعه حتال
هم حاسبينه لاقضى حاجه رجع = وهو قعد من أجل يوكل في الحلال

[الشعف]

حياكم الله يارجال
ما شاء الله الزوامل اليوم تخرع .. معاد خليتوا لنا شي
حبينا نشارككم بالموجود ..

شف كلهم عينه مغني عند صقع=ما يعرفون الا لقرباع الطبال
منكر يشوفونه وما واحد ردع=والبر يتطيّر وكل من كال كال
كل من يجيه الدور في حينه ( قشع )=ولعاد شي يستره لامعوز وشال
عنكور ابوهم مرجلتهم في الوسع=ولا حنّت الرعده تخبّوا في الغيال

[طالب النعماني]

احسنت يا لهاشمي والله ماعندي جواب بعد هذاء
والشعف كلااااااااااامك في عين الصواب
هكذا ياشباب
وين بن حيدره وبن سميدع