مجاراة لقصايد الشعرا يسلم بن عكعوك وطالب باتيس .. طارق بن حيدرة

[طـارق صـالح بن حيـدرة]

ابديت بسم الله رب الجلالي = رب البشر ماخاب من يبتديبه
عساه يغفر لي خطايا فعالي = في يوم من هـوله غدا الشاب شيبه
يقول من عدا على راس عالي = نسل الشيوخ اهل الفعول العجيبه
كنان راسي لا غدى الموج عالي = قلوب جباّره وروس ٍ صليـبه
ابوي واجدادي وعمي وخالي = وعيال عمي فالظروف العصيبه
ومن بعد يالعاني ذكر في قوالي = سلام مني للجمال المنيـبه
عداد ماللبراق ضـوه يـلالي = ومانفح مسكه وعطره وطيبه
الجيد بو صالح جزيل الفعـالي = عند الشدايد كلنا نهتري به
هدّار داهل للحمول الثقالي = يشهد له خصومه ويشهد قريبه
الصعب والكايد وعسر المنالي = لاقد نواه الحيدري با يجيبه
هو راس مالي . ف اللقا راس مالي = واحد ولكنّه يساوي كتيبه
واثني على باتيس له قدر غالي = هذا صحيبي من يخلي صحيبه
انا اشهد انه فوق صم الجبالي = عمّر حصونه دون شكٍ وريبه
لله درّه مطمعه بالعلالي = خلاّ الوطا لهل النفوس الكئيبه
تشهد له العربان اول وتالي = كل المراجل قد طرحها . ب جيبه
مرحى لكم يا اهل السمو والمعالي = اقوالكم مثل العسل . من صبيبه
صاحبك لاقد جاب مرٍ وحالي = اصبر على مرّه . وشل من زبيبه
وان شي خطا . لهل الخطا ما نوالي = والجبر يبقى . واسمنا نعتزي به
واللي بغى يطلع قصورٍ عوالي = لابد ما يدفع رسوم الضريبه
والله من فوق المخاليق والي = يشوف حتى الذر . ويسمع دبيبه
والجيد بو خالد سليل الرجالي = سلام له ماهل ماطر خصيبـه
يبذل ويسعى للعلا ما يبالي = عند القبايل له مكانه وهيبه
كل من يدوّر مصلحة للرجالي = واجب علينا كلنا نعتني به
والختم صلو عد وبل السبالي = عالهاشمي ماخاب منهو حبيبه
عساه يشفع لي نهار الزوالي = وادخل جنان ٍ بالمراعي خصيبه