@ فضايح كتاب الحب @

[الغوربي]

تفضح كتاب الحب صـــورة غلافه
وتبين المحروم نظـــــــرات عينه

الله يجازي عاشقـــــــــين العيافه
هدوا جســـور الوصل بيني وبينه

بكوا عيونــــي بالندم والحســــافه
وأنشـدت ع محبوب يا ناس وينه

شلـــــــوه مني غصب ليلة زفافه
ومـــن بعدها للحين ما شفت عينه

بيني وما بينه تطـــــــول المسافة
والعمر مثل البرق تمضــي سنينه

بالله كل مــــــــن زار خلي وشافه
ينقل له أشواقي ويأخــــــذ حنينه

منه تعلمت الشعـــــــــــر والثقافة
وأصبحت شاعـــر بالتغزل بزينة

اكبر شهــــــادة واضحة باعترافه
لما كتب اسمــــــــي بحناء يدينه

وأعلن لهم اول وأخـــــــــر خلافه
مرت بتاريخ القلــــــوب الحزينة

بالأمس نهر الحب خضره ضفافه
واليوم زرعه قـــــد تخلط بطينه

ذبلت ورود الغصن وأعلن جفافه
حتى اختفــــــى فله معا ياسمينه

مازالت أذكر شـــــو( قلبه) بقافه
واذكر من أيامي الليالي الثمينة

قالوا قنع منه وخـــــــــــل ألقافه
وامسح مشاعر في فؤادك دفينة

قلت الهوى ياناس ما هو سخافة
وكل من بلــــي بالحب ربه يعينه