رد على قصيدة

[سبع الليل]

يامرحبا ببيات من شاعر كما يحي عمر=أبيات منظومه لها معنى تبشر بالعمار
من عند بن محفوظ سوسها مباني بالحجر=يبني سقوفه بالمسلح والقواعد بالحجار
سلام لك من عند بو جمعان مذهول الفكر=مسيت افكر في القصيده لي تشتت بالفكار
قدها مقاله ياعلي الصبر يعقبه الظفر=صبر ثلاثه شهور وسافر للسحيل او الي ظفار
توكل بعون الله وركب طايره والاشفر=وعبر شروره وأنتبه تنسى زهابك والشفار
العبر قدامك وممشاها يوصفونه خطر=قبض يمينك ولا تغامر في المطبات الخطار
حافظ على مالك وسيمانك وزر الحبل زر=شف ذي بشر لا شافوا القبه يحسبوها مزار
ولاقد وصلت الدار باترتاح من ذيك الصور=الله يسترها علينا والذي قد صار صار
الحلو لي نشربه من الابار ذي الايام قر=وبوصريره لي ذكرته يخلط الحالي بقار
وعيال بوزعبل وبن شملان في زره وحر=من بعد مافشلت قضيتهم كلوا بسباس حار
الطير لي بيت يغرد من على الاغصان فر=أيش بايجيب الطير لي هو في السماء والجو فار
ماغير بانصبر وبانوخذ من الماضي عبر=ومن الحوادث والماسي بايزيد الاعتبار
والحكم كحم الله والمكتوب مامنه مفر=لاقد نزل حكمه من حكمه قنع ماشي فرار
ومن ناحيه شغلك طرح واحد يسر القلب سر=يمشي سواء قدام لا يتبع يمينه واليسار
سأل على اصله وفصله وطينته من أي بر=وفيه الامانه وملتزم ولهله وفي مخلص وبار
هذا جوابي قال ابو جمعان وشرعي ماقصر=ان شي قصر وألا خلف قل وحدد لي القصار
والختم باصلي على بو فاطمه مليون كر=تعداد مانادي منادي في المأذن والمكار

[بن قطمان]

احسنت على ابداع قمة في الروعه

وصح الله لسان القايل

بن قطمان

[باكعيكعوه]

صح لسان الشاعر وشكرا للناقل

[الشبامي]

صح لسانك يابوجمعان
كان بودنا نشوف القصيده التي رديت عليها
سلمت واهلا بك في السقيفه

[ايقليد]

هذا القصيدة التي رد عليها سبع الليل الاولى احببت ان انشرها لكم:

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ

نصيحه لكل من عاده في بلاده ماغترب=سرح وضو خلك في بلادك وقت الغروب
وان مالقيت شغل جمع لك اقصام وكرب=شف الغربه مامنها الا الهموم والكروب
شوفو لي يخاطبكم فيها قد استرب=دوروله حصلوه وسط البراغي مسروب
لاهو من عياله ولا اصحابه اقترب=من طول الغيبه حسبوه في التربه متروب
حتى الشعر الاسود من راسه قد هرب=ماهو وقته ذلا الغربه جابت له الهروب
وشوفوه من كاس الشعر قد شرب=يامحلاه من شعر صار عنده الذ مشروب
ولا تحسبوه من اهل الاغاني والطرب=ذلا الفراق جمعه باهل الشعر والطروب
هذه قصه كتبتها لواحد من العرب=معاد حد فيهم اصلي ومن اهل العرب
دلعو عيالهم حد حريبه وحد احترب=واخوانهم في العراق في الفتن والحروب
ماحد رجال فيهم شل سيفه وضرب=لي ضرب با يجيه يوم يصير مضروب

[ايقليد]

القصيدة الثانية تتبع انشاء الله تعالى

[مجمل]

قصيده رايعه من شاعر كبير
منسقه
مرتبه
جزله
لاتحرمونا من هذه الدرر
دمت في عز
تحياتي

[ايقليد]

سلام لبن فاجع وكل من عندهم حضر=لي اكرموا الضيف وفي الشده تلاقيهم حضار
بن محفوظ يستسمحكم من الزلات والكدر=ونحن الاخوه وما بيننا شي كدار
الموضوع باقوله لكم بالمختصر=معاد شي داعي نطول الافضل الاختصار
مرت الايام وحان موعد السفر=وذهنو تقولو لي ماشي سفار
وانا باصبر لمايجي شهر صفر=ومابعد كذا شوه بايجنا الا الصفار
وارسلوا لي من عندكم واحد نفر=بااسلمه المحل في الايام النفار
وبن شملان وبو صريرة كلهم قد عبر=عالتمرين وفاهم شغله ومن الكبار
ووقت الشده باعبر السيول والمطر=كلها الاساعتين وباتلاقونا في المطار
وموضوع العيال ناقشوه في السمر=مانبغى الاشقه وان شي عده بسموار
قلت ماعندي ومنتظر منكم شي خبر=في ذا الموضوع لا تتركونا بلا خبار
وذي خواطر كتبتها من التفكير والسهر=وحده وغربه اكيد مابعدها الاسهار
والختم صلوا على محمد خير البشر=لي جاب لنا الخير والرحمه والبشار

[/poem[/poem]