قال طارق بدعت القول بالله اكبر =مالك الملك سبحانه تعلى على الكون
يابديع السما في يدك الخير والشر =طالبك ترحم المسكين ذي بات محزون
ليل يا هاجسي خيف على سيف عنتر =خل ابوهم طير مابين شارد ومطعون
غص وهت لي صدف من داخل البحر الاحمر =وابدع ابيات موزونه على الواو والنون
خذ لطالب ولد باتيس مني مسطر =بلغه بالتحيه مننااااا ميت مليووون
قله ان كان شي جودات يالحيد لزور =حلها يارفيقي قبل لاموت مغبون
الصديق الوفي في ساعة الضيق يظهر =ولا حل الرخا ياكم صاحب ومظنون
جيت لك معتني والجو عندي معكر =حس بالقلب لا ياصاحبي كير مرشوون
جيت صيح بعالي الصوت راسي مكسر =خل لي ما درو ياطالب اليوم يدرون
لاتقولون عاشق همه الزين لسمر =راح زام المحبه بعد ليلى ومجنون
او تقولون هذا يشتكي طول مهجر =يا مسيكين قلبه في الوطن دوب محنون
لا ورب السما لاني بهذا مكدر =كل هذا بامر الله لاراد بيكون
التعب والشقاوي سبة الوقت لغبر =ذي لقالي كم ملقى في القدس شارون
يوم جور الزمن قد جاوز الخط لحمر =يوم صارو رجال العز بالهون يرضوون
من رجال الزمن لي قفزهم دوب مندر =وين ذولاك ياباتيس حمران لعيوون
وينهم لي لهم تاريخ بالعز يذكر =وين بوزيد وينه وين جعفر وهارون
الوفا والشجاعه والكلام المقهقر =والشرف والكراامه عندهم شرع قانون
يوم شوف الحنش تدرج مع الهام لصفر =والعقارب على حصن العراقي يحومون
واخوته كلهم ماحد نشد او ماتخبر =سوى الشجب والتنديد والراس مغفون
والعجيب العجب من قوم عجمان بربر =جوه با يدركونه يوم ماحصل العون
جات في ذا الزمن اشيا تشيب وتقهر =الوجع في عدن واهل المكلا يصيحون
يحسبون انهم ماهم مع محورالشر = يا مساكين لوكانو كذا بايظنون
كل واحد على قومه وربعه تجبر =بس لاقد ظهر هامان ياويل فرعون
بعدها بايقع مسمر وياخير مسمر =باتحن الزوامل والهوك با يهوكون
نار مابا تخلي عود يابس ولا اخضر =نار باتحرق اللي في حطبها يشبون
عاد شبل العرااقي بايرد كل مكسر =بايلامخ بانياابه شيااطين قارون
والنعاج السمينه ذي لبنها مطير =خلهم يارفيقي من لبنها يفتون
طالبك يا الهي سق لهم ريح صرصر =لا تعكت علينا منك النصر مسهون
من يبا العز يسكب دونه الدم لحمر =موت بالعز يا طالب ولا عيشة الهون
اه يا للاسف يانسل كمن غظنفر =اه من بعد ذاك العز يرضون بالدون
وختمها قال بن حيدور بالسيف لبتر =لي بحده يوقف كل عاصي وملعون
والف صلو على احمد عد مالطير فرفر =وعد ماسالت الوديان من روس عالون
وعد ماهلل المومن وسبح وكبر =وعد ما يرمي الرامي بطلقات مرشووون