بدع من بن عكعوك على شريط الصيعري/ وجواب الصيعري

[يسلم صالح بن عكعوك]

قصيده تعقيب على شريط عايض بن صالح المرقع الصيعري
من يسلم بن عكعوك بن غانم بن حيدره

يا مرحـــبا ترحيـب في قول متقون =رحــب معي يا من سكن في زبــــونه
يا من سكن قـرية علــوجه وذمرون =ومولى صنا رحب من أعلى حصونه
والجـــدفره ليـــت على قول مازون =مــن عند عايض ذي ينــظم لحــــونه
ببن المـــرقع ذي به الناس يصغون =وخوتــــه في وقـــت الشـدايد يجونه
ويكـــرم الضيــفان من حيــث ياتون =من شحـــم عقـّـر ماتشله صحـــــونه
أرجــــــال ربوهـــم نشـــاما يهـدون =لا جا عـــدو واللّه ما يرحمـــــــــونه
ونـــــجا مسالم يلحق الخير والعون =ومــــــن عدوّه لا جــــــنا يزبنـــــونه
ويكرمـــون الجار والعرض مصيون =شيمــه قبــايل يعجــــز الوصف دونه
ما قولـــها مدحه على غير مضمون =كــــلام بن عكــــعوك يعــــرف وزونه
قـــدني معاصرعــارف الكثر والدون =وعرف كلام الصــدق وأعرف طبونه
مانا غــبي عـــارف بظاهر ومـدفون =ونبشه من تحـــــت الثرا من خبونه
وتــــرجمه من قبــل منــــاس يدرون =شفـــــــره في عقلي وحلل شيــــونه
جــــاني شريطك قبـــل ربعي ينامون =خليتــــهم في المحضــــره يسمعـونه
شريــــــط مالي فيه شي إسم مفنون =مرســــــول تـَو ذي هم منوّل يبــونه
والهــــاجس أجبرني ونا قلتله عون =حلل مضامــــــينه وحـــلل فنــــــونه
بغــــــداد ماهي كـل أبـوها لهـــارون =فيـــها عـــــرب كلن بشكــله ولــونه
كلــن يجـي للسـوق صاحي ومجنون =من دون فيــــزه لا عـــزم يدخلــــونه
ون حد يبـــاها حكر له دون قانـــون =مشــــــروع فاشل والعــرب ينكـرونه
متــأكـد إنبه نـاس مابــا يطيـــــــعون =لا تجمعـــت لشـــــوار بايرفضــــونه
وولد با مطـــرف من الوقت مغبــون =أعطــــوه حصـــه لا تخـيب ضنــونه
أعطــــوه قطـــبه خل عياله يعيشون =ماهو سـوا بالعنـــف بــا تــطـــردونه
يا صّيــعري ماهو كذا الناس يلقـون =الجـــار له واجـــب ولحـد يخـــــونه
ما دمـــت واعـي لاتشجع ولد عــون =ذا شــاب مستهتــــر تخوف عيـــونه
صحيح بامطرف طلع شخص فرعون =في عهـــد عنتـــر يوم طــول قـرونه
وأعطاه له بلجيك عالكـتف مـــدهون =والكنـــش في مسبته حـقـط زغــونه
وألقى مسدس تحت محزمه مرصون =يمشــي تقــــول إلا نـمــر في رهونـه
سامحه في ما صار في عهد قارون =عهد مضـى ماحــد ينـــكش غفونـــه
حتى غلط صاحبـــك خاطــبه بالهون =ولا تـظّـــهـر لــه كــلام الـمهونـــــه
خاطبه بالحسنـــى وذي كاين يكون =وانصحه من ذي للخطـأ يدهــقــونه
ذا وقت ماهو زيــن به ميت ملعون =يطعنك في ظهرك وضحـــكة سنونـه
لوغــــاد كثروا والنشامــا يقلــــون =والوقت عايب والعـرب يـمدحـونـــه
قدها ثــــعالب عالنماره يـصولــــون =طمعوا فيَ الضرغام بايفرسـونـــــه
ياخو حمد عكـعوك مغبـون مغبـــون =من ما جراله ذي سنـــه ياغبـونــــه
لاذي بحالي عالجبل فــوق سيــوون =أنهار فوق القصر وأعــدم ركـونــــه
وأختامها صلـوا مـــع ذي يصلــون =عالـمصــطفــى ياسعـــد مـن يتبعونه

الشاعر: يسلم بن عكعوك بن غانم
الجواب في الاسفل

[يسلم صالح بن عكعوك]

جواب من عايض بن صالح المرقع على قصيدة بن عكعوك يسلم

مبخوت رحب جالنا ضيف مسهون =جا من علوجه معتني من حصونه
وأنهم على عمـك حـمـد قلــه يجـون =يجي معـى لـجواد ذي يـسـعـدونه
ياتـون فـوق الجـيب مابـا يـسـيرون =جـديـد مـندر لـلـتـجـر يـجلبــونـه
بساتمه ترقـص ولـه قيـر مضــمون =في طين لحظه لليـحر توصـلونه
تضوون للمـسـمر وذي كـاين يكون =يسلم ضوا عنـدي ونا في سهونه
حـيـا ببن عـكعوك مـلـيـون مـلـيون =عد مشتعل برقه وخصبت مزونه
وأعداد قاري سوره الكـهف والنون =وأعداد مالـجنا ثمر مـن غـصونه
في وادي اعوج حـال ماهو بـدّمون =يـاكـم قبـايـل حـاولــو يـعدلـونـه
ماطـاعـهم مـن حيثـهـم له يرومـون =واخوته وقفــو بالـبـلاجـيك دونـه
مـاحـد يحـب الشـر وهم لـه يبغّـون =لـعرض عـليـهم بالبقش يشترونه
يسـلم وصل عندي وله حب مكنون =ولو خانني حاشا عـليّ ما نخونـه
بطرحه وسط القلب والعين والنون =والسر مابا حـد عـرب يعرفـونـه
ياسامعين الصوت ذا شخص مفتون =يضحك على العربان ما يعرفونه
لأنّهـو ثـعـبـان فـي الـقـاع مـدفــون =لا حانـت الـفرصه تلاقت سنونه
جا من علـوجه معتني فوق صالون =منـشـان يغوي نـاس مـا يفطنونه
قصده يشب النـار في كير مرشـون =بايـغوي الـهبـلان لـي يسـمعـونه
لوّقعـو فـي مـصيـدة كيـف يـلـقـون =في شبكة المحرش وذي يغزلونه
اسميتـلـي بـغداد هـي حـق هـارون =والبرمكي لاخضرت يدخـلـونـه
يدّخلـونـه عندهـم ضيـف مصـيون =مــادام سـاكـن عنـدهـم يـمنـونـه
حق الربع يرعى معى ناس يرعون =ولاحد من أهل المنطقة يطردونه
ضـيفٍ مكـرم بيـن حراس يمسـون =المـوت لـحمـر للـعدو يـخزنـونـه
وأنـّه يبـالـه قـسـم مـا بـا يطيـعـون =يـاكـمن أقـرن كـسّـرولـه قرونـه
وولـد بامطرف بمرصني مرصون =بسجنه فـي غرفـه وبقلـع عـيونـه
أبغيـت ربـعة ذي بجمبـه يشوفــون =ذي هـم مـنوّل لـلـخطأ يـدهقـونه
وأختامها صدّرت لك غصن زيتون =أنــتَ وربـعــك بـسـوا تقسـمونـه
ونك بغيتـه غـرس حـط بذر ليمـون =جمبه ولا راس السنـة تحصدونه

الشاعر: عايض بن صالح المرقع الصيعري

[محمد التميمي]

ابداع جميل في البدع والجواب من الجميع

[يسلم صالح بن عكعوك]

مشكور اخي محمد التميمي
وماقصرت

[%عنابي محترم%]

الله شو هذا البدع والجواب مشكور
عمي يسلم والله لايحرمنا منك
تحياتي.....

[علي فدعق الهاشمي]

ابداع ابداع ابداع في غايه الروعه والجمـــــــــــــــــــــــــــــــــــــــــــــ ـــــــــال كما تعودنا منك ياعم سالم ماتاتي الا بالفصــــــــــــــــــــــوص .

سلامي لك ولدك علي فدعق

[حسن بن قيران بن حيدره]

نشكر الشعار عايض الصيعري والشاعر المعرووف يسلم بن عكعووك على البدع الجميل

[طالب النعماني]

نعم البدع والجواب
احسنتوا ياشعار وبارك الله فيكم وابقاكم لنا دوما

[بالقصير بن حيدره]

مساكم الله بالخييييييييير جميعا,,
وقويتوا كلاً بحاله,,
حقيقة ماأعرف كيف أوصف روعة هذا ال المنتدى بما فيه من أقسام ومواضيع مختلفة ومنوعة وجميلة ومهمة وأحسن مافيها إنها تعكس صورة عن الحكمة والفن والابداع المخفي في وادينا ((وادي حضرموت)) ..
وشكر خاص للشبامي وكل من شارك في إحياء هذا المنتدى ..
كما يسعدني ويسرني بأن أتوجه بالشكر لكافة الشعار وأخص بالذكر الصيعري وبن عكعوك,كما من كافة الأعضاء في السقيفة المزيد من التفاعل لإحياء هذا التراث..


تحيااااااااااااااااااتي للجميع



ابن حيدره

[بالقصير بن حيدره]

كما نرجو من............