ديوان الشاعر حيدره محسن بن قطمان..((هديه من سقيفة الشبامي)).

[خالد بن مهنا]

هذه القصيده جواب على قصيدة الشاعر الكبير/ يسلم بن عكعوك..

يامرحبا مانسنس الغربي رياحه سابرة=من مدلي يمناه باصافحه باليد اليمين
حيا ببو صالح ويانعم الرجال الثايره=ثاير ولد ثاير وحيا الرجال الثايرين
ارحبت يايسلم مكانك في القصور العامرة=زبن العول ماعزه الا قمة الحصن الزبين
يسلم ويسلم بفتخر لو كنت انا باجاوره=عبر حياته في شقى وضمها دنيا ودين
ولا يعول بالعدو يسلم بيقطع دابره=صابر على دنياه بوصالح وقد حاله متين
انا معك لو تصل فوق النجوم الزاهرة=والصبر مفتاح الفرج والله حليف الصابرين
دنيا دنيه قل يسلم في عيوني صاغره=والله ولا بهتم بها رجاي رب العالمين
كل الخلايق ذي عليها بالمذره عابره=لاياشقاء مالك بقاء ولادمي من ماء وطين
والحق يايسلم ومولى الحق لازم ناصره=في صف واحد كلنا ونلعن ابليس اللعين
ابليس ذي يدخل بيوت المسلمين الفاخره=ابليس وابن ابليس ذي فرق جيوش المسلمين
وصاحبي لوهو شطح والله ولاباحاذره=باناصحه وان مارجع بيرجعه قهر السنين
من بعد لسنات القوي يالله بليله ماطره=والبرق فيها يلتهب والرعد من حينن لحين
يسقي بلاد العز ذي تمسي خطمها قافره=ذي لاذكرها قلب بن قطمان يردف بالونين
شوقي لها ماله طرف والنفس تمسي حايره=لترابها واحجارها شوقي وحتى للعضين
ابني بها امال يايسلم وتصبح خاسره=وعد الجماعه بالمساء والصبح قدضاع اليقين
اشجارهم صلبت وهي بلامس تمسي عاطره=والسير ذي لين يبس وذي يبس مابايلين
والحمل مابايحتمل يوم الحموله جايره=يوم القوي يضحك وذي ماشي معه يمسي حزين
والقافله متعثرة وكل ابوها عاثره=وخيوطها متعكلفه بين اليساري واليمين
ذي مايجيلك بالبصر اكيد مابتباصره=بتحاول انك تهدم اسواسه ولو ساسه مكين
عدا زمان الكذب والكذاب نفسه فاجره=والكذب ساسه ينهدم والصدق قد ساسه رزين
حذرتني بالسادسه ياصاحبي والعاشره=ثمان فوق العاشره والحاشدي يعجن عجين
سمكر بيوت العز من برع وداخل داشره=والقا حرس اقوام قطاعه عسى ربك يعين
ومجاملينه جم عنده ذي تطيب خاطره=دقات قلب الادمي تزداد من نفخ الريين
بانطلب الله يسر من بعد السنين العاسره=على دروبه نهتدي في كل شي به نستعين
عساه يرحمنا برحمه لاضوينا الاخره=وتعم رحمة ربنا للمومنين المخلصين
المومنين الطاهرين اهل القلوب الطاهره=العابدين الصادقين الحامدين الصالحين
وجهة نظر دونتها والمهتجس باناظره=وان قد وصل للدار باعشيه بالحم السمين
هذا وصلى الله على ذي كل واحد فاكره=محمد المختار يشفع للخلايق اجمعين

للشاعر :حيدره بن قطمان