بكاء باسندوه شخص لنا الحاله ...كما ماقال بن ماضي لها سهاله .

[عيون المكلا]

بكاء باسندوه شخص لنا حاله = حقيقة واقعة في جنوب وشماله
عليها المرحلة تجلس لنا وتقوم = تجهز ياوطن للواقع المحتوم
إذا هي (تفدرلت ) كلن بمسياله = ويحصد مازرع لهله ولعياله
مخوتنا على ماينبغي بتدوم = تجهز ياوطن للواقع المحتوم
في الماضي رزين العقل مازاله= وبقيت راسخه في ذهون جهاله
خيوط العنصرية سرها معلوم = تجهز ياوطن للواقع المحتوم
على بالك مخالف ذي على باله = مجالك مختلف مايشبه امجاله
وحكمك ياالشبامي في البطل محسوم = تجهز ياوطن للواقع المحتوم
على مسرور كلن علق آماله = أسد للانقضاضة درب اشباله
ونظريات وتجارب معه وعلوم = تجهز ياوطن للواقع المحتوم
تركت الشارقة ورسيت في اصلاله = تبعت البرمكي ذي باع دسماله
بيالجني تبدل بوك ياالصمصوم = تجهز ياوطن للواقع المحتوم
وطننا ياوطن يارمز واصاله = ترابك مسك والعسجد على جباله
نسيمك ينعش المكبود والمهموم = تجهز ياوطن للواقع المحتوم
ولك جيران كلن قال ماقاله = وكل واحد على كتفه طرح شاله
إذا سابوا الجحية يحرسون السوم = تجهز ياوطن للواقع المحتوم
بطت عين الكحيله دوب سياله = وأما القادري مزقول ترثاله
وخوفي للبطل موته يقع مسموم = تجهز ياوطن للواقع المحتوم
بلادي عاشت ابلادي بكل حاله = كما ماقال بن ماضي لها سهاله
حكم باسندوه والا صبح محكوم = تجهز ياوطن للواقع المحتوم