حكيم وشاعر : حيدره محسن بن قطمان ؛؛؛؛؛

**الخليفي الهلالي** · 07-18-2017, 12:13 AM

من ديوان الشاعر بن قطمان

اقتباس : المشاركة الأصلية كتبت بواسطة ;670426

عزيزي وش جراء في دنيتي نكراء وغدارة=وهذا الوقت كله قال بن عبدالصمد غدار
وكلن عاش في جوه وكلن عاش في داره=تناسوني وخلوني مرابط عند ساس الدار
وحتى صاحبي ذي كان يعطيني من اخباره=فجأة انقطع عني قطع وتقطعت لخبار
ونا لحمه ودمه واحفض اخباره واسراره=عيال العم والاخوان ماشي بينهم اسرار
انا قصدي اهنيكم وعمي فوق مقداره=اشوفه دوب في عيني رفيع الشان والمقدار
تمنيت انني بالصين واركب فوق طيارة=واترك ناس ماترحم عيوني نومها قد طار
ولاباتنفع الاعذار لاحد صلح اعذاره=لان الناس باتدري ولاباتنفع الاعذار
انا شفني ذهب صافي ولاحد قاس معياره=وشوفك جوهر الالماس وانته قيس بالمعيار
انا سيفك انا سلاحك تلاقيني مع الغارة=ولاباكون في داري ولابحفر لراسي غار
انا في بيتنا ياعم مانا خارج القارة=ولو ناديتني باجيك مسرع بالطريق القار
ولو قد غصت وسط البحر للّوله ومحارة=معي خبرات بحرية بسوق اللول والمحار
ملاقاتك معي شفها شبيه الغيث وامطاره=ملاقات الضمان المنقطع لادمدمت لمطار
فتحت الشعر لي وانته شبيه النيل وانهاره=ونحن الفرع دايم نستقي من جودها الانهار
عسى ربي يحط الوحي في الاولاد والحارة=وساعة سرلهم باللين وساعة بالكلام الحار
وحصن الشيخ بن عبدالصمد ماتنطفي نارة=ومن قارب حصونه قال شاعر بحرقه بالنار
تأسس عالكرم والجود ربى خيرت اخياره=وجيلا بعد جيل اخيار رباهم وبعد اخيار
وقد جاب الحدد هم والنجر كلن بمنشاره=بنا والعود فوق العود حطه شق بالمنشار
وبيته بالبنا عامر بحلانه وزواره=سنين الويل عدت منقطع من بيته الزوار
عياله رحبو بالضيف لاقد جاء من اسفاره=ويجلس بينهم ينسى هموم البعد والاسفار
ونا بصبر على جور الزمن لي نفس صبارة=وبعد الصبر ربي بايعين المومن الصبار
سلامي يبلغ الوادي من المجراء الى اصباره=وقربه من عسل اما فراقه من صبر صبار
ودنيا فانيه والناس فوق الخط عباره=ويوم البعث ربي بايرد الناس قيس اعبار
وحد في داخل الجنة وحد يصبر على ناره=عسانا داخل الجنة ونسلم من حريق النار
وصلو عالنبي المختار ذي للدين اختاره=عسى يشفع لنا المصطفى محمد المختار
نشر الاسلام بالدنياء وقد جاهد بكفارة=جنوده عزهم ربي وقد هبو على الكفار

حيدره بن قطمان

سلام؛؛؛؛؛