مساجلة ( مقدم الصيعر ) كاااااملة .. بعد الفرز

[الشعف]

اخواني الاحباء .. رواد هذه المساجلة الشعرية .. استميحكم عذرا واطلب منكم الاذن في نقل مشاركاتكم في فصل ( مقدم الصيعر ) مجتمعة في مشاركة واحدة هنا ... خالية من التعليقات التي طرأت عليها ... وذلك كي يتسنى لنا وللحلان الاطلاع عليها والاستمتاع بمظمونها ... دونما خدش بها ... مع مراعاة انه قد تم النقل بحذافيره .. ارجوا قبول ذلك والعفو اذا اخطأت ... مع التنويه الى ان المساجلة الشعرية و مساجلات الشعراء ستستمر كل في مكانه السابق والمخصص لها الى ان يشاء الله ..

[poet font="Simplified Arabic,4,black,normal,normal" bkcolor="" bkimage="http://www.alshibami.net/saqifa//backgrounds/13.gif" border="double,6,gray" type=0 line=200% align=center use=ex char="" num="0,black"]
جمال العطاس:
مقدم الصيعر بغوا واحد بداله=وفتشوا داره ولا لقيوا بديل
مابايقع تبديلهم له بالسهاله=باتسمعون الرعد في آخر سهيل
هم حاصروا الريده وهم قتلوا عياله=والساتر الله لا كثر فيها العويل
جابوا مزاحيهم وحطوها قباله=جابوا عددهم والمعلم والقبيل
الحُمر طمعانين في ماله وحاله=ولا اظنه بايسلّم (مستحيل)
الشعف:
الصيعري مسكين فركوا به رجاله=وقع لهم تدحيق من تحت الرجيل
خلوه يترفس .. عطف ثوبه بشاله=ماحد رثي حاله .. ولا لهمه يشيل
مـاحد ولد عمه ولا حد ود خاله=ولا معه صاحب مرافق او خليل
مسكين بوصعير ترى يبكيك حاله=صابر على قرزه وما ظني يحيل
واثــق انـا انه..مابايعطف رحـاله=بايكيدهم .. ذي هم يطلبوا له الرحيل
جمال العطاس:
أصحابه اللي ضيّعوا حق الزماله=ولا لحق صاحب يعينه أو زميل
هم جابوا الحُمران رغبه في قتاله=من جاب لحمر بايكون اول قتيل
والخوف لايرهن مشالحه وعقاله=ويستدين المال من سالم عقيل
والحاصل ان الوقت كله في سفاله=هينن تدبرها مكايد للسفيل
احمد العطاس:
مقدّم الصيعر لي ضيّع طواله=يومه تمسّك بغانم بن طويل
حفّت شروجه كما حفّت سياله=ولا نظِرْنا سيل في الوادي يسيل
مقدّم الصيعر لي خبثت عماله=قد له زمن ياخوي لامريكا عميل
لي طيّر القهوه يدحق عا دِلاله=عاد المحمّس بُن في الدلّة دويل
كل من يربّي ضبع ملقيها بجاله=شف بايقع له هول يالسامع جليل
وإن كان قد ضحّى بواحدمن عياله=با يلحق الوحلة نصيبه والعويل
جمال العطاس:
الله كافي الخلق من شرالفواله=والمشكل الذره اذا فتكت بفيل
شوف المقدم مافزع من باكلاله=خايف من الحُمران ذي هي باتكيل
مابه قهد لوبايدحّوها جباله=والراعه الا لاطمر وسط الجبيل
البخس عالملسان اصحاب (....)=يارب تسترها علينا ياجليل
عمر خريص:
مقدم الصيعر وقع في خس حاله=يوم تبع شوره ولا فكر يحيل
ضيع الفكره وضيع راس ماله=ولا اظن اليوم عاده بايميل
المعني قام له ماسك وصاله=فوق راسه رافع الا بالصميل
والبصر غلق ولا باتقع سهاله=لي وقع فيه قط والله مش سهيل
لا محب ينفع وذي قدها مقاله=عصيدك فرصها بلا قالوا وقيل
شف العرب كلين طاويها حباله=مثل العذارى لي يخافين الحبيل
الزقر يبغونه ويبغوها الجماله=وان قد تعنوا بايحصلون الجميل
الشعف:
حـتى آل بـن كـده بغوا حق الدلاله=ويـحلفون ايـمان .. مـعهم كـم دليل
زاد الـحقد فـيهم .. وتـبعته الـ/////////////////////////=بـغوا عـزيز الـقوم صاغر او ذليل
مـاقـصدهم الا .. يـقـدم الاسـتقاله=والـصيعري يـحلف .. انا ماباستقيل
والشعب في عزله ؟! فشت فيه البطاله=كـالف محن اهوال من عهد(ن) طويل
صـابر عـلى اللي فيه ..يكفيه الثقاله=دركـوا عـليه يـاناس شوا حمله ثقيل
شوا الصيعري ان راح باتروح الاصاله=بـاتضيع ارض الـخير والعلم الاصيل
لاتـصدقوا لـحمر .. يـناشد بالعداله=كـذ خـان اقـرابه وصـهره والعديل
ذلا زمـان اول عـبر وقـت الـنباله=مـاليوم يـاخس وقت .. ما واحد نبيل
قـصده مـفاتيح الـحكم والا غـلاله=ويـاريت بـاتكفيه .. بـاتشفي الغليل
بـايحيك احـواكه عـلى نجد وصلاله=بـاتسمع الا الـرشخ يـصقع والصليل
جمال العطاس:
راثي انا للهِرم يفزع من ظلاله=عامد في النعمه وفي الظل الظليل
اول قدر يشرد مع اولاد خاله=وسكن في الطايف مع الخل الخليل
وان قام ذاك الغيث اوحطت سباله=باتشوف كل واحد يدوّر للسبيل
والسيل با يقحش نخيله مع مواله=وبايصل تاليه لما الف ميل
مابا يشل دينار واحد في شواله=يالله يشل نفسه مسيكين الشليل
ماتكفي العدّي اذا ماشي رجاله=والخايف اللي ماتشله شي رجيل
هم حاسبين العِرس مزمار وطباله=يكفي عرفنا القربعه هي والطبيل
احمد العطاس:
الهيج لي يسحب ويرزح في عقاله=ماعذر مايضوي غنيمة بن عقيل
ولد الكلالي اللي لحقهم بالكلاله=من ذريهم شفناه بالمصرى يكيل
لي هو قطع عمه مع جملة خواله=ولعاد خلّى له محب والا خليل
وعامل الجيران باعمال السفاله=بايسحبوه اهله الي امّان السفيل
مرّي على يمينه ونهدي عاشماله=والحكم والمرجع مقدم باشميل
الخوف لاهو قد لحق قصده وناله=لاتشبعه دجله ولايكفيه نيل
جمال العطاس:
شور المقدم جابهم في خس حاله=ماشاور القعطه وشاور بن حويل
جاه الذي ماكان يخطرله بباله=له دبّروا تدبير في عتمه بليل
بعض العرب قد له من الله الجماله=وبعضهم ماله جماله اوجميل
سلّط عليه الله ذاك الوغد جاءله=هذه عقوبه له من الله الجليل
جاء بايكيل الحب في البصره كياله=طمعان في كركوك منها بايكيل
وبايشل التمر مع خبز النخاله=ولعاد باتسلم زراعه اونخيل
الصيعري والجار مره في ال/////////////////////////=الصيعري تابع واما الجار ذيل
الشعف:
يـهـوين يـاصـيفان .. قـتلتك الـحماله=اصـبر عـلى حـملك .. تـحمل به حميل
الـوقـت ذا وقـتك .. وبـاتظهر رجـاله=والـجـيل ذا لــو راح.. بـايتبعه جـيل
بـاقول كـلمة حـق .. قـط مـاهي هباله=ومـا بـدا فـي يـوم.. كـذ كـنته هـبيل
ظـالـم مـقدمنا ... ولـحمر بـه ظـلاله=واثـنـينهم فــي شـمس مـافيها ظـليل
الـصيعري لـه قـسم فـي هـذي البداله=بـس صـدق يااخوان .. مارضى به بديل
لـحـمر اذا شــل الـمـقدم واسـتماله=كـــل الـدحـامـيل بـعـده بـاتـميل
وبــا تـنـتهي يـاخـوان ايـام الـدواله=وبـا نـقع اسـراء .. كـما سـابق دويل
حــرام امـتـنا .. تـقـع بـيد الـحثاله=وتـقـودنـا الـحـمران اولاد الـحـثيل
لـي شـرعهم بـاطل .. وكـاذب بالحياله=بـايـغيرون الـحـكم .. هـذا مـستحيل
مـاهو غـباء مـني .. حـشا ماهي غفاله=بــس حـالنا نـبكيه بـالصوت الـغفيل
يـكفي سـبوا ارض القدس .. سلبوا رماله=وحـريم فـي عـز الـفرح صارت رميل
قـتلوا شـيوبتهم .. ومـا سـلموا عـياله=وجـيـران تـتفرج وتـضحك عـالعويل
قـريب نـص الـقرن عـبرت عـالوباله=والـمقبلات اكـثر واعـظم فـي الـوبيل
نـحـنا تـبـهذلنا فـشـت فـينا الـهزاله=والـذيـب دايـم يـوكل الـكبش الـهزيل
لـمـا مـتـى يـاامتي .. ويـن الـبساله=نـسكت ونـتفرج .. عـلى جرح(ن) يسيل
كـذ كـان فـينا جـرح مـاطقنا احـتماله=امـا ثـلاث جـروح .. مـانقوى الحميل
اقصى وشلوها .. وذي دجله بغاها في مناله=والله يـعـلم .. لاشـطح .. بـايقول نـيل
بـاصبر عـلى صـيفان .. بـاتحمل علاله=ارحـم مـن الاحـمر ابـو الـقلب العليل
والـعـفو يـااخوان .. آسـف عـالاطاله=يـاريـت كـل واحـد يـقع بـاله طـويل
صـلوا عـلى الـمختار مـن رب الجلاله=احـمد شـفيع الـكون ذو الـقدر الـجليل
[/poet]