شي من الماضي الجميل

[حمومي من النيد]

بسم الله الرحمن الرحيم

بصراحه مش عارف ليه جت في بالي هذة القصه ...
المهم سوف اسردها لكم وهي قصه واقعيه حصلت
في قديم الزمان مع واحد من جدودي من بيت مجنح
العليي وهذا جدي من قدى العجوز ...

كان جدي في الحيق وهذة تسميه لساحل حضرموت
وكان رايح الى النيد وهذة تسميه لوادي حضرموت
المهم كان طريق القطار حقهم يمر على قوده راس النعر
والقطار المقصود طريق بالجمال .
وفي راس قوده دخل عليهم المساء ونوخوا الركاب للمبيت
وشعلوا النار للعشاء واثناء السمر جا لهم رجال غريب
وقال يابن مجنح انا ربيعك وهذا حصل على غفله
وطبعا" يحيروا الناس ال اول وقال جدي
بو عمرو
انته ومن معك في وجهي
وقال للقوم اللي معه عشاء للهادف
وقاموا وذبحوا جمل من الجمال وفرقوا الحموله حق
الجمل المذبوح على الركاب الباقيه ..
وتعشوا وبعد العشاء قال لواحد من عياله ياسالمين
مع طلوع النجم تسرح انت والهادف الى عند الصروم
وترقبوا لنا لما نعود ...
وفعلا" جدي سالمين والهادف سرحوا وجدي فرج سرح الى
تريم لكي ينزل حمولة الركاب .
وعاد للصروم جدي من تريم
وقال للبدو اللي عنده شوفوا هذا في وجهي وقاطعوا كلامه وقالوا
اللي في وجهك في وجهنا .
وعاش الغريب معهم ولا اي احد سئل من تكون او من ايش من قبيلة
واللي حصل مع مرور السنين شافوا السلوك حق الغريب سلوك قبيلي
وزوجوا الغريب من عندهم والغريبه ان جدي فرج الله يرحمه مات ولم
يعرف من ايش من قبايل الغريب
ومن الصدف ان الغريب استشهد في غارة الديس .
وخلف ولد وبنت .
الولد خلف اربعه اولاد وذلحين ما شاء الله عليهم قوم .
قبل موته في الديس الشرقية اعترف لجدي علي بن سالم بن حبريش
انه
من قبيلة فلان .؟ وهذة القبيلة من اشرس القبايل بحضرموت
وبعد غارت الديس اول شي سواه جدي علي بن سالم بن حبريش
سماء ابن الغريب باسمه الحقيق وسوا تطروبه .

الى هنا وانتهت القصه ...

طيب ذلحين نحنا هنا مانتعارف ولاشي ولاكن في ترحيب بكل عضو جديد
وبدون ان يسئل عن اسمه او من ايش من قبائل .
شوفوا كيف الصدف ...

مع تقديري واحترامي
التوقيع : حمومي من النيد ( المجهول )