والشمس كسفت ساعة الظهريّـه

[يسلم صالح بن عكعوك]

بسم الله الرحمن الرحيم

السلام عليكم ورحمة الله وبركاته

كتبت هذه القصيده في عام 1998 أو 1999

مناسبة القصيده:

سافرت للسعوديه من اجل اعتمر والحمد الله اعتمرناا وسكنت في حجره في شارع
بن لاذن في كيلو سبعه ولكن شاءت الاقدار وانطفت الكهربا والشمس كسفت كليّا
واذا ببن عكعوك في ظلمه هايله لا كهربه ولا ضوو وخرجت للشارع وجلس
على دكه امام دكان واتصلت بالجماعه وجوني الجماعه وفي الليل كتبت هذي الابيات المتواضعه وعزمت للرياض وللاسف منعوني قالو انته جيت بالطايره ولازم ترجع بالطايره وانا قصدي ازور الجماعه فالرياض
وهذه مناسبة القصيده

اطلبك يارحمن يارب البشر=يامن خلقت الانس والجنيّه
تغفر لعبدك لا توّطا في الحفر=لا قد ضوى في داره الصدقيّه
من حيث ماينفعه ماله لو كثر=فلحد مايندر معه خمسيّه
مافوقه ألا الثوب لبيض مختصر=يندر بلا رادي ولا جنبيّه
مسكين ماينفعه عذره لعتذر=لا مال يشفعله ولا ذريّه
ولا محامي لي يرجّع له خبر=وش صار له في حفرت(ن) مخفيّه
لا جاه منكر يسأله عمّا صدر=فل ظاهره واعماله السريّه
ماينفع النكران لا حتّى نكر=اقرا كتابك في صحف مطويّه
عبدك اجيرك يالقدير المقتدر=يخشى عذابك ليلة الحشريّه
يالله بعفوك لاتدخلنا سقر=تايب لوجهك مخلصين النيّه
نبعث مع المختار والسيد عمر=في سعفهم في روضت(ن) مرضيّه
حنّا ويا الخلفا الميامين الغرر=ذي صدقو باياتك المكيّه
وتحملو كل المصايب والضرر=من اجل تعلى الراية الفضيّه
عثمان والصديق في مكه صبر= وابو الحسن مخلص مع باريّه
ذا فصل والهاجس وصل بعد السمر=وانا بحجره مظلمه مطفيّه
قد كان فيها ليت واحد وانكسر=والشمس كسفت ساعة الظهريّه
انهمت بو رايد وصلني معتذر=وجا كرامه محتزم في زيّه
وسعيد بن يسلم وصل جاه الخبر=ان ولد بن عكعوك في غدريّه
جونا عيال اجواد رميان الضفر=نسل آل غانم ينجحون الكيّه
ذي يرعضون السيل لا حط المطر=ويوكلون الناجحه والنيّه
انهار صب لكليل يوم القيظ حر=ندرو لخرم المال باللحجيّه
وبل قصّير والله انه ماقصر=لا عند بو صالح وصل عانيّه
جانا المقدم هو وخو سالم عمر=ذي يكرمون الضيف بالنجديّه
وعاد خو جمعان صالح منتظر=وجاء ولد عمه عوض مازيّه
وسعيد من مخدر قدا خاله نشر=ابوه مادوّر لحد حضريّه
مذري على ذيهم يجلون الكدر=تركت محمد يقطبون الخيّه
وبعد يامرسول باشر للسفر=اقصد مدينه عاصمه فنيّه
لا دار بو تركي حلاله والمقر=ذي حل في الحوطه وفالدرعيّه
مقصدك لا بو شيخ واسمه مُنتشر=فأرض اليمن غنت له البدويّه
من عطفت المشقاص لا وديان سر=وفي حِزَرْ غنت له الكنديّه
وفي عَتَقْ غنت وصوت الباضفر=وفي صنا غنت له الصنويّه
ذي قفّل الخشعه وزر الحمل زر=غابت على جيش العدا ضحويّه
والقايمه رقلت وعثكل مستقر=وزلزلت لدقام والبريّه
وتقابلو جيشين من بحر(ن) وبر=بالميج والميراج والروسيّه
تحمل قنابل موت صنعوها الكفر=ترمي بلا شفقه ولا حنيّه
بو شيخ حرّم أي واحد مايمر=جده غلب في كلة الحربيّه
المصنعه غلبت ودقم الخزع صر=وتغلب البلجيك والبلخيّه
ان خو علي يبقا الزعيم المنتضر=في الفترة الاولى وفي الحاليّه
من بعد ذا سلم على كل من حضر=ما يلمي البراق في منشيّه
سلم عليهم جمع ما باخص نفر=عندي سوا الحدري مع العلويّه
مانا مجامل زيد أو جامل عمر=قدهن سوا الميلاد والهجريّه
وقلهم عكعوك من مقدم صفر=وذا جماد أول دخل نابيّه
ماحد سأل عن حال شاعر ماقدر=يشرح لكم احواله السريّه
مفكر من الدنيا ولابي شي عسر=الحمد له عد ماقرا قاريّه
ماقصدي إلا في لقاكم والسمر=وديّت جيكم والطرق محجيّه
مل كسب مالي فيه من وقت الصغر=اغفر لجدّي ذي كسب شاميّه
مانا مفكر في المراوي والوضر=قدني غني حتّى معي ربيّه
الشرج بايشرب وبا يلقي ثمر=باتعبر القيضه معا الشتويّه
حب الغنيمي باندقه فالوصر=من حب صافي عينة البرديّه
ذي يشبع الجيعان لا جا فالغدر=كل ضيف با نعطيه له قافيّه
الحمد له ثلثين من عمري عبر=أوله قد عدّا بقا تاليّه
ون بدرت الارواع روعي قد بدر=المرجله ماهي لحد مسميّه
قدها لمن يسعالها قبل الكبر=يضمر على وديانها الفرعيّه
ون قد بلي خلا الحجر يلطم حجر=يشرب على المشنون والكدريّه
ماهي لمن يعزف على خيط الوتر=بالكذب يبنا امجاده الوهميّه
وهو معا حرمته لا ندرت ندر=يندر يحر في اهدومه المكويّه
في العصر يندر لك يفر السوق فر=مظهره عنتر والغبا بدريّه
هاذاك لو يبتاع بعته عالتجر=لكنها ظلمتني الحريّه
لا هو خلق فالوقت لوّل ذي عبر=انشهد ان بيعه على شاريّه
ماود اخطي غير قلبي ماصبر=حسيت كبدي والريا مضبيّه
مقهور بن عكعوك من خس البقر=من ثور باشجره معا راعيّه
وختمها صلو على سيد البشر=ذي قد قبر في قبة المزويّه

اخواني المشرفين عندي مشكله في دخول السقيفه
ساعه تشتغل واسبوع ماتشتغل
ارجو منكم اصلاح الخلل

[!! شلون مغليك !!]

صح لسانك يا بن عكعوك

قصيده رائعه جدا من شاعر معروف في ميادين الشعر

الله يعطيك العافيه

اخوك

ابوحسني

[عازف العود]

بن عكعوك ايه الشاعر العملاق احسنت وصح لسانك وكإن هذه القصيده نضمتها قبل اسبوع

راااااااااااااائع ياعم يسلم وكما عهدناك جزل وباروتك جديد وسلبك بلجيك

تسلم يابو صالح وكل عام وانته بخير

[طالب النعماني]

تسلم تسلم
يابن عكعوك الله يعطيك العافيه
وربي يتقبل منك ان شالله العمره

[ابوهارون]

وهو معا حرمتـه لا نـدرت نـدر ###يندر يحر فـي اهدومـه المكويّـه


صدقت يا بن عكعوك !!! بعض الرجال يا ريته ما وقع !! ويا مكثرهم


صح لسانك قصيده تهيّج المشاعر !!! لا هنت

[أبونمر]

قصيده واكبة الحدث يابن عكعوك
تشكر على هذا الزخم الثري يالغالي
تقبل تحياتي وشكري

[آل هميم]

قصيدة أكثر من رائعة سلمت على القصيدة الرائعة وللأمام




دمتم في رعاية الله

[ميزان القوافي]

بن عكعوك شاعر لايشق له غبار . ولايحتاج شهادة أحد . والشاعر الذي مثل بن عكعوك لايمكن لميزان القوافي ان يوزن قوافيه . حيث ان بن عكعوك قد تخطّى هذه المرحلة واصبح يقول الشعر على السليقة .
ابداعات بن عكعوك يجب ان تكون مثال يحتذى به للمبتدئين في الشعر والذين لازالوا يخطئون في الوزن . لاشك ان في قصيدة بن عكعوك اخطاء املائية فقط . ولكن ميزان القوافي يجزم بأن الوزن 100% صحيح وسليم ولايحتاج الشعّار الكبار لملاحظة احد على الوزن فكيف ببن عكعوك وهو من اكبر شعراء السقيفة الذي يبهرنا شعره وملكاته وقدراته الشعرية المذهلة

بن عكعوك
اخي الفاضل ارجوا ان لاتبخل على المبتدئين في الشعر وحاول أن توصل لهم الفائدة منك في اصلاح اوزان قصائدهم ز ولو برسائل خاصة لكي يستفيدوا من وجودك ووجود امثالك كالجعيدي وباتيس ومجمل وكشميم وغيرهم .

لك المحبة والاحترام

[أميرة الوادي]

شاعرنا القدير يسلم صالح بن عكعوك ما أروعها من قصيدة

ما شاء الله عليك دائماً ما تبهرنا بطول نفسك

لا أملك إلا أن أقول فيك :

شاعر ظهر نوره على مدّ البصر = له في القصائد موهبة أصلية
يكشف لك المغزى بقول (ن) مختصر= واكثر كنوزه عادها مخفيّة
يا رب( يسلم ) تحفظه من كل شر = تكتب له الجنة وتغفر ليـّه

[ابو يوسف بن شحبل]

السلام عليكم

تسلم تسلم يا بن ععكوك على القصيدة الرائعة الجميلة وحتى قلت كلام عادي سوف يكون شعراً وكيف وأنت أهل الشعر

قصيدة أعجبتني وقمت بحفظها على طول

جونا عيال أجواد رميان الضفر **** نسل آل غانم ينجحون الكيّه

صدقت آل غانم دايم ينجحون الكيّه وشاهد لهم الزمان


أبنك ، أبويوسف بن شحبل