ويش رايكم في هذه القصيده

[مخاوي اليل]

مدري ( تفو ) هي مدح ولاّ شتيمـة







حــتــى وردنـي تالـي الـليـل جــوال

وانا على شاهي وبسكـوت ديمـة

الرقم بايخ لكـن الــصــوت قــتـال

كنــه مثل صـوت المذيعـة حليمـة







قــالت مساء الخير يـا طيّـب الفـال


قـلـت ارحــبـي تــرحيبـةٍ مستديمـة

بـالـعــود والصفـري ودلـة وفنجـال

واجـبـك يا بنت الأصـول الكريمـة

وردت بضحكة ثم قالت وش الحـال؟

قلت اشهد إن الحال عقبك سقيمـة

قالت وهي تضحك بعد مثل الأطفال

وانـــا بـعـــد كــنــي بــدونـك يتيمـة

مـــن يـوم قـالـتهـا تزلزلـت زلـزال

مــن فجعتي كنـي مسـوي جريمـة

قلت ارفعي صوتك ترى مابه ارسال

كـــذاب لــكـنّ المصيبـة عظيمـة

قالت أقول اسمع ترى هرجنـا طـال

مــمكـن تصاحبنـي ترانـي وسيمـة

واسمي الحقيقي أول حروفـه الـدال

لــكـــن يسمّونـي البنـات الزعيمـة

صحيح أحب الفخفخة واعشق المال

لكـن ترانـي طــاهــرة مستقيـمـة

ما عندي امغازل ولا( لعب أطفـال )

ما عندي إلا في الشرف والحشيمـة

بس الصراحة قلبي لشوفتـك مـال

واصبحت وحدك جالسٍ في صميمه

فكّر بعقلك واترك القيـل والقـال

واحذر تطيع اهل العقـول العقيمـة

وارسل علي الحين خمسميـة ريـال

أشحن بهـا جـوال أختـي غنيمـة

أو طقم غالي فيه خاتـم وسلسـال

أروح بـه فـي عـرس ولاّ عزيمـة

قلت الحقيقة مانيب رجـل أعمـال

ولانـي بتاجـر والمـوارد عديـمـة

أنا الصراحة شبـه عطّـال بطّـال

وعلاقتـي بالفــقـــر جـداً حميـمـة

والراتب الله يرحم الحـال مـا زال

محـدود والمصـروف ربـي عليمـه

والــديـن بـالآلاف والبنـك شغّـال

يــاكـل فـلـوسـي بالربـا والظليمـة

والسوق طايح والغلا ضيّـق البـال

والموت والله صايـر اكبـر غنيمـة

قالت تحمّل بـس والحمـل ينشـال

خلك شديد الباس صلـب العزيمـة

ياخي تصرّف جعلك اتصيـر نشّـال

أهـــــم شــي إن النوايـا سليـمـة

لابــد تـفـهمني علـى كـل الأحـوال

ما دمت من أهل العقـول الفهيمـة

قلت إيه والله فاهم اللي على البـال

لــكــن تــرى هـذي علينـا قديمـة

يــا بـنت هـذا صايـر اليـوم مـوال

للي تبي تلعب علـى ابـن اللئيمـة

يا بـنــت ما تدرين كـم فيـه محتـال

يلعب على الحبلين وانتـي غشيمـة

يا بنت كم من جاهلة دمعها سـال

من عقب ما جات العواقب وخيمـة

والبنت لا اقتفى عرضها بيد الأنـذال

والله مــا يــبـقـى لهـا أي قيـمـة

قالت تبي ولاّ فـ خـلّك علـى جـال

مهوب ناقصـني نصايـح حكيمـة

عز الله إنك للأسف منـت رجّـال

وانك قليل الذوق ما فيـك شيمـة

يا لعنبو اللي مـا يسطّـرك بنعـال

حــتـى يـعـلمـك الغـزل يـا بهيمـة

) تفو ) عليك وصكّت الخط في الحال

مدري ( تفو ) هي مدح ولاّ شتيمـة؟؟

[علي فدعق الهاشمي]

مخاوي الليل تسلم اخوي اِختيار متميز يدل على رقي ذوقك صح الله لسانك ولسان قائلها تحياتي لك

[بنت الرياشية]

هههههههههههههههههههههههههههههههههههههه

(تفو ) شتيمة

مشكور أخوي

[صوت سيبان]

قصيده جميله ياريت أخوي مخاوي الليل تذّيل أسم قائلها

[عفاف]

أول موضوع للاخ الفاضل مخاوي الليل ,,, يسلمو.

[صالح باعمران ابو زايد]

اهلا وسهلا بالاخ العزيز مخاوي الليل
ياهلا بك مليون..... والقصيدة ما تحتاج
مثل ماقال شاعرنا علي فدعق تدل على رقي ذوقك ..
وفعلا انت صاحب ذوق رفيع..
الف شكر لك على هذا النقل المميز
ومنتظرين المزيد
سجل اعجابي الشديد بهذه القصيدة باهية الجمال ...
اخوك صالح باعمران

[عمر الذيب]

لك كل الشكر على هذا الا ختيار
والجهد الذي تقدمه
عمر الذيب

[خالد بن مهنا]

صحيح ان الشعر رساله..والشاعر هنا ارد ان يرسل رسالته لمن يهمه الامر..وشرح سلبيات في المجتمع العربي..واشياء حاصله في الواقع..

شكرأ لك اخي العزيز مخاوي الليل..ويامرحبا مليون شرفت ونورت عذب القوافي..

اخيك:خالد بن مهنا

[مخاوي اليل]

هلا والله بشباب كلهم اخوان واخوات تسلمو على المرور الطيب
وان شا الله ان انقل لكم كل ماهو طيب وماعندي قريب شكل الحليله وصلت

[عفاف]

بإنتظار المزيد من قصائدك ان شاء الله ربنا يوفقك.