من باطل الوقت جم قصرات قاسيتها ( جواب للشاعر الكبير يسلم بن عكعوك بن غانم )

[طالب النعماني]

أبديت بك ياإلهي ياعزيز القدر=ياباسط الأرض وجبالك بها ارسيتها
ياعالم أسرار في علم الفضاء والقمر=وتعلم أسرار وسط الجوف أخفيتها
سالك بلطفك وغفرانك نهار انقبر=والطف بنفسي نهار البعث لا حييتها
في يوم موعود باتجزي جميع البشر=يابخت كل نفس بالغفران جازيتها
والفي صلاتي على المختار صفوة مضر=عدة نجوم السماء لي فوق أعليتها
صلاه تغشى ضريحه عد نزل المطر=وعد مانبتت الازهار لاسقيتها
وبعد ذلحين بارحب بذيب الغمر=حيا تراحيب بالعداد ماحصيتها
حيا بيسلم ومن سعفه ضوى للسمر=شاعر لجاويد له قيفان غنيتها
مثل البغية تشل الشوش هو والكدر=كم من قصيدة على قافيه جاريتها
واليوم يشكي لنا حاجات يااهل المقر=مايدري إني ثمان اسنين عانيتها
قولوا ليسلم لعد تشكي زماني عبر=في سعف جاويد قد حادوا على صيتها
حي من دلاعيس ماتحسب حساب الخطر=كمين عقبة وكم عصرات عديتها
واليوم معلول عظماني تراقل بشر=من باطل الوقت جم قصرات قاسيتها
وانته تباني من الأحداث جيب الخبر= وانته بعدستك للجمهور بثيتها
يايسلم اليوم من قل النظر والبصر=شف بعض لخبار ماسمعها ولا بغيتها
وانته بناظور مديت البصر والنظر=شفت البعيدة ولي في القرب ما رأيتها
ياسارح الصبح في صالون وارد قطر=شل الرسالة لـ بن عكعوك خطيتها
فيها جوابي نقشته فوق صم الحجر=صنعة حليلة على الجودات ربيتها
حي من حليها طغت عاكل بحرٍ وبر=كل الحلايل وكل الجن عاديتها
بين العضائد تخلي الحبل مزرور زر=ماشي ملامة علي لو كنت عزيتها
وانته في الشعر ياعكعوك رقمك عسر=ماتحسب الجن لو تحضر عفاريتها
هذا جوابي ونرجوا العفو لو شي قصر=يامن معزتك فوق الراس حطيتها
يانسل عكعوك بونشوة كبير العجر=يامن بسمعته جم هامات وطيتها
واختم بيوتي بمن جاب الكتب والسور=عد ماتشهدت في فروضي وصليتها
كلن يصلي على المختار يامن حضر=تمت بيوتي وبالمختار تميتها