قصيدتين رثاء للشاعر سعيد بن عمر وسالم بن صالح ال مراضيح

[ابن النقيب]

قصيدة الشاعر سعيد بن عمر بن مرضاح

يامن اليك الامر واليك المرد = انته ملاذ الادمي وانته المعين
مالنا خلافك وانته الفرد الصمد = اغفر زلــــــلنا يا اله العالمين
والطف بمن وقته منكد به نكد = واخبار تتوارده دايم ماتزين
واخر خبر بالذات قد العظم قد = لو هو وقع عاحيد قاسي مايلين
يمكن تزلزل في مكانه وارتعد = وارجع حصى منثور في لحظه وحين
منه بقي الجوال حامي ما برد = وكأن وسطه لاهبه ترشن رشين
بوفاة من له قدر في قلبي يعد = فوق الكواكب والنجوم الزاهرين
اخوي والقدوه وعزي والسند = لي يقتدي به الاولي والتاليين
عميد الاسره والزعيم المعتمد = من بعد والدنا من اسنين السنين
حكيمنا مهما قرب والا بعد = كلامه اغلى من ذهب غالي ثمين
والعز والناموس عاطول الامد = يشهد بانه حازها دنيا ودين
يحزن عليك الجول لا يابوحمد = والجدفره والوادي الاعوج حزين
حزن المحب لاجل المحب شرعا ورد = بحديث وارد في رياض الصالحين
ماظن حد مسلم يخالف ما ارتصد = من قول سيد الانبياء والمرسلين
يابوحمد من حبه الله استــــــــــــعد = قلبه وبه حبب جميع المسلمين
الله يغفر لك ومن جــــــــد وجـــد = يشرب من الكوثر وكل صافي معين
في سعف سيد الانبياء لي هو وعد= بشفاعته يوم الصراحه واليقين
صلاة تغشى المصطفى عد مارعد = وامست سيول الخير عاحصاها وطين
ذكره يزيل الهم ويزيل النـــــــــــكد= يامن سمع قولي يصلي على الامين

وهذه قصيدة رثاء في المرحوم
صالح بن عمر بن مرضاح الجعيدي من ابنه سالم بن صالح بن مرضاح

يقول بوخـــــــــــــــالد بذكرك بابدي = يالواحد المعبود مانعبد سواه
والفي صلاتي عالحبيب الهاشمي = واله وصحبه و الذي جاهد معاه
وبعد يالهـــــــــــــاجس تكلم بالذي = جالك في التلفون يلفت الانتباه
ضيق على حالي ونـــــكد خاطري = زيد هموم القلب جم من حين جاه
عاهاتفي جاني كانه جــــــــابلي = الهستره والضيق يالله بالنجـــــأه
وقال صبرك عالمصيبه يابني = والدك مــــتوفي وذا امر الالـــــــه
من حين ما سمعته تغير كل شي = وندمت عاكل يوم قضّيته بلاه
وانهد عزمي ذاك ذي دايم قوي = وخبر كمـــا هاذا انا ماقدر علاه
لانه يخص والـدي ذي فضله علي= ولا بظني يوم عز واحد كماه
ماحد مثيلك قال ســــــــالم يا ابي = يا تاج راسي ديما في ذي الحياة
يانور ماتمنيت انه ينــــــــــطفي = اقسم برب البيت ذي هو في سماه
لان بوحمد يفداه كل ماهو معي = روحي وقلبي والذي نملك فــــداه
لانه زعيم القوم لي به نقتدي = والعقل والحكمه من المولى عطــــاه
اما الكرم والجود جم ماهو شوي = لاقد طلبته بايمــــــد كل ما معاه
الله يغفر له مع كمن تـــــــقي = وعسا يقع مثــواه في الجنه عساه
من حيث كمن نهر في الجنه صفي =كل من عمل بالطيب يتحقق مناه
واختم بيوت الشعر في ذكر النبي = صلوا على من خصه الله واصطفاه